admin
Ethel Ncube
KUDABA olutshwaqisa umzimba kulenina leSiyaphambili, eFilabusi okubikwa libambane lomnewabo lomntanalo babulala isithandwa salo, basitshisa andubana basingcwabe kabili.
Abathathu laba uSiphathisiwe Sifiso Dube, lendodana yakhe uMqondisi Mnkandla kunye lomnewabo uBhekimpilo Nkomo bamiswe emthethwandaba weFilabusi kuviki ephelileyo besetheswa icala lokubulala uStanley Moyo.
Umtshutshisi kulelicala uMnumzana Shepherd Moyo ubikele inkundla ukuthi uDube wayethandana lomuyi uStanley Moyo basebexabana mhlaka 16 Ncwabakazi bengakibo kaDube.
Inkundla izwe ukuthi ngesikhathi besilwa indaba yakhona yangenelwa nguMnkandla loNkomo abahle baqala ukutshaya uMoyo wafa bayamngcwaba eceleni kwentaba.
Kubikwa ngemva kwamalanga amathathu izinja zamphanda zakhipha amalunga omzimba wakhe babona esedonswa yizinja okwenza bathatha isidumbu basitshisa andubana bayesingcwaba kutsha futhi bebathathu kungela omunye umuntu.
Umantshi uMnumzana Abednico Ndebele utshele abasolwa laba ukuba babhalele emthethwandaba omkhulu bacele ibheyili.
Online Reporter