admin
UNOZINTI wodumo oweSekhukhune United, uTapuwa Kapini, usebahlanyisa abalandeli lenkokheli zeqembu lakhe eselidlala kuDStv Premiership.
Ngesikhathi unozinti weZimbabwe efika eSouth Africa, ezovimbela iPlatinum Stars (Silver Stars) ngo-2006, wayelamaphupho okunqoba inkezo zonke lokulandela amanyathelo abanye abadlali.
Konke lokho kutshabalale njengamazolo ebona ilanga njengoba amanye amaqembu adlale kuwo acine edliwa lizembe esigabeni esikhulu.
UKapini waziwa njengoMoses okhipha amaqembu ebugqilini (GladAfrica Championship), awafikise eKhenani, ezweni loluju, kuPremiership.
UKapini (37) usize iHighlands Park yafika kuPremiership kumasizini amabili edluleyo. Ubesezintini zeSekhukhune ngesizini edluleyo ecine ingenile kuPremiership.
Wathengiswa yiHighlands, ithengwa nguTim Sukazi oweTS Galaxy, wathatha isinqumo sokuyolanda iCosmos kuGladAfrica.
“Ngemva kokuthengiswa kweHighlands, abaqeqetshi abatsha bangitshela ukuthi angikho enhlelweni zabo, ngathatha okungokwami ngahamba. Ngithathe isinqumo sokuthi nginceda uBra J (Jomo Sono). Ngakhuluma laye savumelana. Ngathi ngisendleleni ngisiya kuye, ngathola ucingo oluthi abeSekhukhune bayangifuna, Ngaphenduka ngaya khona,” kutsho uKapini.
UKapini, oke wadliwa lizembe ekuMaZulu FC, waziwa njengomdlali ohlala ezihlekela futhi ozwana labo bonke abantu.
“Njalo nxa ngehlela kuGladAfrica ngisuke ngazi ukuthi ngizobuya kuPremiership. Ngicabanga ukuthi sengilolwazi oludlula ngitsho abanye babaqeqetshi.”
Manje uKapini uhlalelwe ngumsebenzi wokwenza isiqiniseko sokuthi iSekhukhune ayibuyeli kuGladAfrica ekupheleni kwesizini.
Emdlalweni olandelayo bazadibana leStellenbosch FC mhlaka 11 Mpandula.
Emidlalweni emibili yeDStv Premiership, bavule ngokutshaywa yiChippa United nge-1-0, kowesibili bathole imiklomelo agcweleyo besehlula iMaritzburg United nge-2-0.
Online Reporter