admin
Cornelius Luphahla
ABACULI bezokholo kuleli sebebumbe inhlanganiso yabo ngenhloso yokuthuthukisa umculo wezokholo ngemva kokunanzelela ukuthi umculo lo kawuqakathekiswa kakhulu ngabantu.
Inhlanganiso le ithiwa yiZidafo Gospel njalo imele amalungelo abaculi bezokholo, ibathuthukisa ngendlela ezehlukeneyo kanye lokubancedisa ngokusakaza umculo wabo kuzulu wonke.
Umculi wezokholo ongomunye wamaqembu abaculi abakule inhlanganiso uNombeko Khahlela uveze ukuthi amalunga ale inhlanganiso manengi njalo ngawakuleli kuphela noma nje inengi lawo litshayela ingoma zalo phetsheya.
“Kule inhlanganiso silabaculi bezokholo abangu-50 njalo lokhu sibamukela abanye abaculi bezokholo abafuna ukuba lathi. Inengi lethu siculela ingoma zethu kweleSouth Africa kodwa okwamanje sikhangelele ukuyazitshayela kwelakithi koMthwakazi.
“Ngalokhu sikhangelele ukuthi sihambe siliqula ukuze siyejabulisa abantu besikhangele ukuze bengawuthatheli phansi umculo wethu,” kutsho uNombeko.
UKosalem Tshuma umholi weqembu leKosa and the Pilgrims ubikele intatheli ukuthi njengenhlanganiso yabaculi bezokholo bakhangelele ukuthi baziphekele amaDVD abo basizane njalo ngokunye njengabaculi.
“Sikhangelele ukuithi sibe lemitshina yethu yokuphekisa amadlalade kanye lama-DVD ukuze sithuthuke kwezomculo.
Okunye njalo sikhangelele ukuthi wonke umculi okule inhlanganiso simncedise ekubhaliseni ingoma zakhe ngokusemthethweni ukuze aziwe ngabantu.
“Ngokwenza lokhu senzela ukuthi labancedisa abaculi ngendleko ezehlukeneyo babone ukuthi lathi sikhona ukuze basisize kokunye esikuswelayo,” kutsho uKosalem Tshuma.
Ekhuluma loMthunywa uEdomeco ongumculi okule inhlanganiso uchaze ukuthi njengabaculi baphila ngokucula yikho besungule inhlanganiso le ukuze bazincedise.
“Njengabaculi siphila ngokucula yikho okudale ukuthi sisungule inhlanganiso yethu le ukuze sincedisane enhlupheni zonke esihlangana lazo ekuculeni. Sikhangelele njalo ukuthi sincedisane ekuculeni ukuze umculo wethu uthole udumo kuzulu,” kuphetha uEdomeco.
Online Reporter