admin
UNOKWANDA Gotywa (42) ohlala esiqintini seBhongweni eMthatha kweleSouth Africa uthi amaxhegu amahlanu ayegqoke amajazi amanyama afika emzini wakhe ngeviki ephelileyo acela ukudla.
Ekuqaleni wayecabanga ukuthi uyaphupha kodwa ngemva kweviki nje impilo yakhe isiphenduke imbedumehlwane ngenxa yokuvakatshelwa ngamaxhegu la.
UNokwanda ukhathazekile ngoba ucabanga ukuthi amadlozi akibo athukuthele njalo ayamlandela.
UNokwanda uthe: “NgoLwesihlanu ngeviki ephelileyo ekuseni ngehola lika 5 wavuka waqala ukulungiselela ukuya emsebenzini.
“Ngasuka endlini yami yokulala ngaya kweyokuphumula lwangitshaya lwangeqa uvalo ngithola amaxhegu amahlanu agqoke amajazi amanyama ehlezi emasofeni ami.”
Uthe elinye ixhegu lamane laqala ukukhuluma lathi bangamadlozi akibo njalo balande ukuzacela ukudla lokunye okuthile.
“Ngahlaba umkhosi umkami owayelele ekamelweni lethu lokulala wahle weqa embhedeni weza kimi kodwa wathi efika amaxhegu lawana ayesenyamalele.
“Lokhu engakubonayo kwangethusa njalo ngatshona ngiqhaqhazela ilanga lonke.
Umkami wahle wathi sidinge isangoma ukuze sizwe ukuthi kuyini okwenzakalayo.”
Uthe isangoma abasivakatshelayo samlaya ukuthi apheke umqombothi, adinge ibhokisi lomentshisi kanye lezithelo lemibhida kube yisipho kwabaphansi.
“Isangoma sathi ngifake ibhokisi lomentshisi, umqombothi, izithelo kanye lemibhida ngikufake ngemva kwesivalo somkulu wami.
“Ngenza konke isangoma esathi ngikwenze kodwa ngelilandelayo ngamangala ngithola konke engangikufake ngemva kwesivalo kukhona.
“Isimanga yikuthi ngathola incwajana eyayibhalwe ukuthi ‘Uyadlala, thina sifuna ipizza’”.
Ngafonela isangoma sangiphendula sithi lokhu saqala umsebenzi asikaze sihlangane labaphansi abacela lokhu okucelwa ngabami.
Ngemva kwalokhu isangoma lesi sageza izandla sathi ngeke senelise ukungiphathisa kungakho-ke kungangcono ngizothatha imali engangiyibhadele kiso.
Esinye njalo isangoma, uGogo uNkanyezi uthe nxa abaphansi becela ukudla akusikho ukuthi bafuna okuya esiswini.
“Bekudingakala imbuzi emhlophe ihlinzwe, hatshi imibhida lezithelo.”
UNokwanda uthe imuli yangakibo idinga isangoma esilamandla esizabakhokhela kumsebenzi lo ongejwayelekanga. —Ubulembu
Online Reporter