admin
Samkelo Tshuma
INHLANGANISO yeAgritex iqhube uhlelo lokufundisa abalimi bakoBulawayo ngobuhle bokulima umhlobo wamakhowa obizwa kuthi yi-oyster, eMhlahlandlela ngeviki ephelileyo.
UNkosikazi Irene Mabharani ufundise abalimi ukuthi lumhlobo wamakhowa uthandwa ngabantu abanengi ngoba ulakho njalo ukuvikela eminye imikhuhlane engahlasela abantu enjengemvukuzane lokuqinisa amasotsha omzimba.
Abalimi bahlonyiswe ngamacebo abangawenza ukulima lumhlobo wamakhowa ukuze bathole isivuno esingabatholisa inzuzo ephezulu.
UNkkz Mabharani uveze ukuthi umhlobo wamakhowa lo ulomkambo omkhulu ngoba abezitolo kunye labamahotela bayawakhwabitha.
Abalimi bafundiswe ukuhlela kuhle imali abazayisebenzisa ukuthenga impahla efunakalayo ukuze bangabi lendleko ezinengi.
UMnumzana uMunashe Majuta oyisisebenzi se-Aagritex ugcizelele ukuba kuqakathekile ukuthi abalimi bagcine isikhathi kukho konke abakwenzayo njalo babe lebhajethi yomsebenzi wabo.
“Ukulima amakhowa libhizimusi kungakho kuqakathekile ukuthi umlimi abe lebhajethi ukwenzela ukuthi ngemva kokuthengisa izilimo zakhe abone ukuthi uthole inzuzo yemalini,” kuchaza uMnu Majuta.
Abalimi akade besenza izifundo lezi baphinde bafundiswa ngokuqakatheka kokufaka amakhowa abo emaphakethini.
“Umlimi kumele asebenzise impahla ehlanzekileyo nxa ethengisa amakhowa. Ulakho ukuthi awafake phakathi kwamaphakethe lawo azenza kubelula ukuwathengisa.
“Kumele njalo awahlalise endaweni eqandayo ukuze engonakali,” kutsho uMnu Majuta.
UNkkz Mabharani uphethe ngokucebisa abalimi ukuthi bengakathengisi isilimo sabo kumele bakwazi ukuthi bazasithengisela bani, ngemalini ukwenzela ukuthi bangaze bawadulisa njalo bangawathengisi ngemali ephansi.
Online Reporter