admin
KULE iviki iphephandaba likazulu lize lezinye njalo indaba ezimnandi kwezokuthokozisa uzulu nanku phela lize lengadlangadla yeqembu labafundi abagida umgido wesiVenda kuzwakale. Leliqembu lidabuka eBeitbridge.
Kambe kungaba yisiphi isikolo esingasungula iqembu elenza izimanga ezingaka ngaphandle kweZezani High School.
Kaligidi nje leliqembu lenza izimanga. Othanda ukujabula kule iviki nansi ingxoxo enambithekayo phakathi kwentatheli yephephandaba likazulu uCornelius Luphahla (CL) lomholi waleliqembu uDickens Sipho Mathuthu (DM).
CL: Akuthi fahlafahla ngembali yeqembu lakho mfokaMathe lokuthi kungani walisungula?
DM: Iqembu lethu salisungula ngomnyaka ka2011 ngemva kokunanzelela ukuthi amasiko esiVenda ayatshabalala ngakho nxa singasungula iqembu azavuseleleka. Ekusunguleni iqembu leli sabona kungcono ukuthi sigide umgido othiwa yi-malende ngoba yiwo ophethe ezamasiko kakhulu.
Iqembu leli salisungula njengesikolo iZezani High School ngenhloso yokuthi abafundi bakhule bewazi amasiko abo.
CL: Ngaphandle kokuthuthukisa ezamasiko kuyini okunye elikubona kungathuthukiswa liqembu lenu?
DM: Okunye njalo okuzaphakama ngenxa yokusungula kwethu iqembu leli yikuthi abafundi bazaphumelela ngcono kwezemfundo yokuthokozisa uzulu njengoba kumnyaka ozayo kuzasungulwa izifundo zePerforming Art ku A-level.
Lokhu kuzabasiza ngoba bazabe belolwazi lezokuthokozisa umphakathi.
CL: Abantu bathini ngeqembu lenu leli elalisungulayo njengesikolo?
DM: Abantu bayawujabulela umsebenzi wethu lo esawenzayo njalo basikhuthaza ukuthi siqhubeke siwenza njalo sithuthukise iqembu lethu. Okunye njalo basikhuthaza ukuthi sifundise kanye labasakhulayo ukuze amasiko engatshabalali.
CL: Likhangelele ukwenzani njengeqembu lezamasiko elijabulisa uzulu?
DM: Njengeqembu sikhangelele ukuqhubekela phambili sijabulisa uzulu njalo sikhuthaza uzulu ukuthi nxa kulemikhosi etshiyeneyo asimeme sizojabulisa abantu. Okunye njalo sikhangelele ukwenza umkhosi omkhulu wokuvuselela ezamasiko lapho esizamema khona amaqembu ezokuthokozisa uzulu atshiyeneyo ukuze azosixhasa emkhosini lo.
CL: Ngaphandle kokuba ngumholi waleliqembu mfokaMathe akutsho ukuthi msebenzi bani owenzayo empilweni?
DM: Mina ngaphandle kokuhola iqembu leli ngingumbalisi khonapha eZezani High School. Yikho-ke okwenza ngasungula iqembu khonapha esikolo.
CL: Njengoba iqembu lenu uthi ngelabafundi ngeke baphambaniseka ezifundweni zabo ngenxa yeqembu leli na?
DM: Abafundi ngeke baphambaniseke ezifundweni zabo ngenxa yeqembu leli ngoba baphatheka kuleliqembu ngemva kwezifundo njalo abaphatheki nsuku zonke. Okunye njalo abafundi laba bathola ulwazi kuleliqembu olubanceda kwezinye izifundo ezifana lembali kanye lezamasiko.
CL: Lokhe lasungula leliqembu bunzima bani eliyake lihlangane labo emsebenzini wenu lo?
DM: Ubunzima esihlangana labo njengeqembu yikuswela imali yokuzithuthukisa, okunye njalo yikuthi iqembu lethu lisaselincane ngakho alikaziwa kakhulu. Thina sikhangelele ukuthi siphatheke emikhosini etshiyeneyo ukuze iqembu lethu lithuthuke ngamandla.
Online Reporter