admin
YiNtatheli kaMthunywa
IQEMBU lamaMighty Warriors kuzamele lilungiselele liphelele nxa lifuna ukuthi likhankasele ukwenza kuhle kumqhudelwano wamantombazana enguqu eAfrica oqala ngeviki ezayo eCameroon.
Lokhu kukhulunywe ngumqeqetshi uShadreck Mlauzi ngesikhathi eqala ukulolonga amantombazana esizwe elungiselela umdlalo wobungane phakathi kwama-Mighty Warriors leBanyana Banyana yeSouth Africa ngoLwesine enkundleni yeRufaro.
Kumqhudelwano wamazwe eAfrica, amaMighty Warriors aphoselwe kuqula elilamazwe abalisa iSouth Africa, iCameroon leEgypt. Umdlalo wobungane lo uza ngesikhathi inhlanganiso yeZimbabwe Football Association igxanguza ngokuncedisa amantombazana esizwe, kulandela imbiko ethi iqembu alitholi lutho kulinhlanganiso. Yona iZifa iyakuphika lokhu, ngoba umongameli wayo uPhilip Chiyangwa uphume kumaphephandaba ngoLwesibili ebika ukuthi iZifa ayisoze yekele ukusekela amantombazana.
Lokhe ancintisa kunkezo yamaOlympics, amaMighty Warriors abethwele nzima ecela ukuthi asizwe ngosekelo lwemali lokudingelwa imidlalo yobungane kusase lesikhathi. Isicelo lesi besingezwiwa ngumuntu emawofisini eZifa.
UMlauzi uthe isenzo lesi sebesijwayele njalo usekhuthaze abadlali bakhe ukuthi baqophe ukuzikhulisela amabizo endaweni yokuthi bazihluphe ngokwenziwa ngabaphathi bomdlalo elizweni.
“Engikutsho nsukuzonke yikuthi abadlali bami abaqinele ukudlala kuhle, banqobe, baphinde bakhulise amabizo abo emdlalweni. Ukukhala akusizi. Umdlalo wethu leSouth Africa siwulindele njalo sesiqalisile ukulungiselela,” kubika uMlauzi eseHarare.
Umqeqetshi lo kazange afihle ukuthi abadlali bakhe baphenduke kukhefu sebefuna ukulolwa okuzwayo.
“Liqiniso sibili ukuthi inengi labo baphenduke bediniwe njalo bekhanya ukuthi bafuna ukugijinyiswa okuzwayo.
Sihlale isikhathi eside singadlali, okuyikhona okwenze ukuthi kuvele egcekeni ukuthi amantombazana asilela ukulolonga.
“Loba kunjalo, ngilokuthaba ukwasiza isizwe ukuthi ngemva kokulolonga abadlali bami okwamalanga amabili, sebevuke bathi khwatshu. Umdlalo wethu leBanyana Banyana siwulindele.”
Online Reporter