admin
Wayne Ncube
KULAMADODA amabili agwetshwe udilikajele ngoLwesibili kuyonale iviki emthethwandaba omkhulu koBulawayo kulandela ukukhanda enye indoda ngamatshe ekhanda ize ife andubana bayihlubule impahla bayitshiye ithe daca endleleni.
UVusumuzi Ndebele (35) kanye loPerfect Sibanda (30) kabazange bachithe isikhathi senkundla nanko phela bahle bavuma icala labo.
Umtshutshisi kulelicala uMnumzana Kudakwashe Jaravaza ubikele inkundla ukuthi mhlaka 5 Nhlangula ngomnyaka ka2018 abasolwa bahlasela uJoseph Mutaviri emgwaqweni weNational Railways eMpopoma, esiya emasimini.
Kuzwakale ukuthi ababili laba bamkhanda ngamatshe ekhanda, basebemhlubule impahla bamtshiya enqunu.
Kubikwa uNdebele loSibanda batshontshela uMutaviri impahla ayezigqokile kanye lomakhalekhukhwini we-Samsung S3 onguye owancedisa ukuthi babotshwe.
Umtshutshisi uqhubekele phambili esithi umntakaMutaviri ebona uyise engaphendukanga emasimini, wavuka ekuseni esiyamkhangela lapho athola khona abantu bebuthene wathi ethi mehlo suka wabona kunguyise.
Inkundla izwe ukuthi abasolwa bathengisela uFidelis Madzonga umakhalekhukhwini athi ethumezela omunye umuntu i-ecocash yasisetshenziswa ukumlonda waze wabotshwa wasechaza ukuthi umthengiselwe ngubani.
Kubikwa ababili laba sebebotshiwe bachaza ukuthi icala leli balenza njani.
Umehluli kucala leli bekunguThompson Mabhikwa.
Online Reporter