admin
Listen Ndlovu
KULEMULI yesigabeni seZhombe ngaphansi kwenduna uNtabeni etshiye izakhamizi zakoBulawayo elokitshini leMganwini zizidla amathambo engqondo kulandela ukuyatshiya isidumbu sesinye isihlobo sayo siphakathi kwebhokisi, komunye umuzi ngoba ithi umufi wabulawa ngomunye umuntu wakulowo muzi.
Kubikwa isehlakalo lesi senzakale kumaviki amabili edluleyo esigabeni seDundubali eMguza lapho okucatshangelwa ukuthi uKwanele Moyo wabulala uTadiwa Moyo ovela ngaphansi kwenduna uNtabeni eZhombe kubangwa intombi.
Amalunga emuli yakoMoyo amahlanu kubikwa afika koMoyo eMganwini mhlaka 23 Mpalakazi 2021 athi afuna inkomo ezingamatshumi amathathu ukuze kuyobekwa uTadiwa, andubana afulathele.
Indaba yacina isibikelwa amapholisa kunye labaphathi besigaba okuyikho okwabangela ukuthi isidumbu sikaTadiwa sithwalwe sihanjiswe esibhedlela seUnited Bulawayo Hospitals lapho esilokhu sikhona.
UMthunywa uzwe ukuthi amapholisa asexhumane lenduna uNtabeni ukuze izimuli lezi zikhumisane umlotha kubekwe umufi.
Isikhulumi samapholisa akoBulawayo uInspector Abednico Ncube uthe lindaba isaphenyisiswa.
“Amapholisa asadinga laba abahlanu, athemba njalo ukuba azathola uncedo enduneni uNtabeni ukuthi badinge labo abahlanu babuzwe imbuzo ngaphambi kokuba kubekwe icala. Isidumbu okwakhathesi sisesibhedlela seUnited Bulawayo Hospitals,” kutsho uInsp Ncube.
UMthunywa uxhumane lenduna uNtabeni weZhombe othe udaba olunjalo solufikile kuye kodwa usalinde ukuzwa ukuba imuli yakoMoyo ingaphansi kwawuphi usobhuku.
“Udaba lwendoda ebuleweyo, imuli yangakibo yayatshiya isidumbu emzini walowo owenze lokho solufikile kimi. Amapholisa ake angifonela mayelana ngodaba lolu. “Uhlupho olukhona yikuthi indawo engaphansi kwami inkulu kungakho ngicela amapholisa angiphathise ukuze sibekwazi ukuthi isigaba losobhuku walapho okulabantu laba ukuthi ngubani ukuze silandele kuhle umkhondo wodaba lolu,” kutsho induna uNtabeni.
Uphethe ngokuthi njengomkhokheli womdabu uzaqala ukulungisisa udaba lolu angabakwazi imuli yakoMoyo.
Online Reporter