adminNcekwenhle Ncube
ZITHWELE amagabha avuzayo izakhamizi zelokitshi elidala leMakokoba ezakhele duze leMakhosi nanku phela oguluva babakhuthuza nsukuzonke njalo bebabhaxabula.
Kubikwa kulamajaha aselomkhuba wokucathamela abantu nxa selisiya ngomtsha wendoda emangweni weMakokoba duze laseMakhosi babakhuthuze imali yabo.
Lokhu kuvele emthethwandaba weTredgold ngoLwesihlanu evikini edluleyo lapho uEdmore Tawanda Moyo loMbonisi Tatenda bebesetheswa amacala okubamba amapholisa inkunzi kathathu kunyanga ephelileyo.
Umtshutshisi kulelicala uMnumzana Simbarashe Manyiwa uchazele inkundla ukuthi ometheswacala laba benza okungekho emthethweni bahlasela amapholisa amathathu bawathathela impahla zabo eziligugu ezigoqela omakhalekhukhwini lemali.
Umantshi uMnumzana Crispen Mberewere udlulisele phambili icala leli lizangena mhlaka 9 Lwezi.
Intatheli ixoxisane lezakhamizi zakule indawo zachaza ukuthi seziyesaba indawo le.
Esinye isakhamuzi sakule indawo esiziveze ngokuthi nguSarah Nyoni sichazele iphephandaba ukuthi akusaqunywa kule indawo nxa sekuntambama ngoba besesabela impilo zabo.
“Sesisesaba ukuhamba ngenyawo nxa sisiya ezindlini zethu siquma ngendlela yeMakhosi. Kulamajaha asehlala elinde abantu kule indawo bebamba inkunzi.
“Nxa bengabona ukuthi bayakwazi bayakutshaya kumbe bakubulale. Abantu bathwele nzima kule indawo ngomakhuthuza.” kutsho uNkosikazi Nyoni.
Kuzwakele ukuthi kulamanye amajaha agwetshiweyo kunyanga edluleyo esetheswa icala lokubamba inkunzi lokubhaxabula abantu endaweni efanayo.
Omunye umfakazi oqotho ongathandanga ukuchazwa ngegama uthe sebebanengi abantu abathathelwa impahla zabo eziligugu emini lebusuku kungabi ndabazalutho.
“Abantu babanjwa njalo nje kule indawo. Abanye babanjwa emini abanye ebusuku bathathelwe imali lamafoni.
“Silethemba khathesi amapholisa azasukumela phezulu njengoba abanengi babo yibo ababanjwayo kulezinsuku.”
Kubikwa amapholisa azasebenza nzima ukuqeda lobu bugwelegwele obenzakalayo ngokuphangisa ngoba amasela lawa ekhanya edelela umthetho.
Online Reporter