admin
YiNtatheli kaMthunywa
INHLANGANISO ezimele yo eyeEnvironment Africa (EA) isikhuthaza uzulu kuzigaba zonke zelizwe ukuba asebenzise irenewable energy ukuze kwenqatshelwe ukutshabalala kwemvelo.
I-renewable energy yikusebenzisa amandla emvelo asetshenziswa ephindwaphindwa. Amandla la abalisa i-solar kumbe ibiogas digester.
Abantu bandise ukusebenzisa inkuni ekuphekeni lanxa intuthu yazo ibangela ukuguquka komumo womkhathi okubangela ukuba izulu lingani ngendlela efaneleyo.
Ekhuluma loMthunywa uMnumzana Barnabas Mawire onguMqondisi wenhlanganiso le kuleli, uthe abantu kumele batshiyane lomkhuba wokugamula izihlahla kunye lokutshisa amavili nxa bethapha inyosi.
“Abantu kumele bekele ukusebenzisa amandla abhidliza imvelo anjengokubasa umlilo. Abanye batheza inkuni ezimanzi okwenza intuthu yazo ilimaze imvelo.
“Kubalulekile ukuba abantu basebenzise amandla elanga isolar energy ekuphekeni kumbe basebenzisa ama-biogas digester wona angalimazi imvelo.
“Abantu baphinda babhidlize njalo imvelo ngokugamula izihlahla nxa besiya biya emasimini kukanti emadolobheni izititshi ezidubuka kokuphela kubikwa ziyabulala imvelo ngoba ingcekeza le iyabe ileminye imithi ebulala imvelo,” kuchaza uMnu Mawire.
UMnu Mawire uqhubekele phambili wathi abantu kumele babiye amasimu abo ngocingo hatshi ukusebenzisa izigodo.
Omunye umlimi ohlala eNyamandlovu uMnumzana Thomas Nkiwane uthe ukusebenzisa amandla emvelo kuqakathekile njalo kulula kakhulu nxa kuqathaniswa lokusebenzisa amalahle.
Online Reporter