Online Reporter
Innocent Kurira
AMATHEMBA amaWarriors engabe ebonakala efiphala kumkhankaso wenkezo yomhlaba, kodwa abadlali bahlezi belomqondo omuhle njengoba bekhangelane lemidlalo ebalulekileyo leBenin lamuhla leNigeria ngemva kwensuku ezine.
Abadlali baveze ukuzimisela ukuthi balwele ukuthi ilizwe lifike kunkezo yomhlaba. Omunye wabadlali laba, uPrince Dube uthe bazafuna ukuthi benze lokho abakwenza kumidlalo yokungena ku-Afcon.
“Silungiselele. Sifuna ukuqhubeka senze kuhle njengalokho esakwenza kuma-Afcon qualifiers, sijabulise uzulu. Kufuna ukuthi sibe lethemba lokukholwa ukuthi sizakwenza,” kutsho uDube.
Omunye njalo umdlalo, u-Isheanesu Mauchi ochinsa ukubizwa kuma-Warriors uthe kuyamjabulisa ukuba yingxenye yeqembu.
“Ngizizwa ngijabula ukuba labanye bami eqenjini, abadlala ekhaya labadlalela amaqembu aphetsheya. Kuhle ngoba bonke bangamukele eqenjini ngoba kangizizwa ngimutsha. Siyimuli nye. Ngithembisa ukuthi ngizadlala kuhle.”
UKhama Billiat ukhulume ngesidingo sokuzigqaja.
“Sihlezi silungiselele ukudlalela ilizwe. Ngifuna ukubonga abalandeli bamaWarriors ngosekelo abasinikeza lona. Usekelo lolu lusifuqa ukuthi senze ngcono njalo siqhubekele phambili njengabadlali.
“Yilizwe lethu leli. Siyakubongela ukubizwa ngumqeqetshi njalo siwulindele umdlalo wethu,” kutsho uKhama.
Ukubuyela kukaKnowledge Musona eqenjini lamaWarriors ngemva kokuthatha umhlalaphansi ngo-2022 yikho okusematheni abalandeli bomdlalo kulandela ukwethulwa kweqembu elikhethwe ngumqeqetshi uMichael Nees, elizadlala leBenin leNigeria, kumkhankaso wokuyadlala kunkezo yomhlaba. UMusona (35), sewahlohla amabhola angu-24 kumidlalo engu-49 kumaWarriors. UNees kade wabika ukuba uyamfuna eqenjini umdlali lo.
Ukaputeni uMarvelous Nakamba uzabe engekho ngoba ulimele.
Kumdlalo wakuqala, iZimbabwe izadlala leBenin mhlaka 20 Nhlolanja eDurban. Kowesibili ileNigeria mhlaka 24, e-Uyo. Okwakhathesi, amaWarriors ku-Group C akunombolo yokucina elemiklomelo emibili kumidlalo emine.
UMusona waba ngukaputeni welizwe kumqhudelwano we-Afcon ngo-2019 lango 2022.
“Ngijabulile ukuthi uKnowledge uphendukile. Sidinga ukwenza isiqiniseko sokuthi silomdlali oqinileyo endaweni ngayinye njengoba sisiya ku-Afcon,” kutsho uNees mayelana ngokubuya kukaMusona.
Uthe uMusona wafuna ukudlala lakuma-Afcon 2025 Qualifiers.
“UKnowledge ubehlezi ezimisele ngokubuya. Kwakumele abe leqembu ngoLwezi nyakenye. Ngabe saba lenkinga ngomnyaka odluleyo eCameroon, wayezimisele ukuba khona.”
Abadlali bama-Warriors:
Onozinti:Washington Arubi (Marumo Gallants), Marley Tavaziva (Brentford), Martin Mapisa (MWOS FC)
Imvimbi: Jordan Zemura (Udinese), Divine Lunga (Sundowns), Gerald Takwara (Al Minaa SC), Munashe Garananga (FC Copenhagen, Isheanesu Mauchi (Simba Bhora), Peter Muduhwa (Scottland), Godknows Murwira (Scottland), Emmanuel Jalai (Dynamos)
Abasesiswini: Marshall Munetsi (Wolves ), Andy Rinomhota (Cardiff City), Marvelous Nakamba (Luton Town), Mihood), Tawanda Chirewa (Hudders filli TScottand), Knowledge Musona (Al-Okhdood), Tawanda Chirewa (Huddersfield Town)
Abagadli: Prince Dube (Young Africans), Tawanda Maswanhise (Motherwell), Terrence Dzvukamanja (Supersport United), Tymon Machope (Scottland), Walter Musona (Scottland)
