admin
Thokozile Mbedzi
NGENHLOSO yokuthuthukisa ezemfundo esigabeni seBeitbridge umeli wedale lePhalamende kule indawo usenike izikolo ezintathu kunye logatsha lwezemfundo ingwalo zokubala kunye lezokubhalela.
Umeli uAlbert Nguluvhe unikeze izikolo ezibalisa iBeitbridge Government School, St Mary’s Secondary kunye leVhembe Secondary School amabhuku okubala kunye lawokubhalela andubana anike amanye awokubala angu-400 ugatsha lwezemfundo esigabeni lesi.
Ekhuluma lephephandaba likazulu uNguluvhe uthe okumnike intshukuntshu yokunika izikolo amabhuku yikuthi ufisa ukuthi abantwana bafunde lula esigabeni lesi.
“Ngifisa ukuthuthukisa ezemfundo lapha, ngifuna abantwana bakulesisigaba baphumelele ezifundweni zabo.
Njengoba sebethole ingwalo kuzakubalula ukuthi bafunde ngoba kunzima ukuthi bafunde nxa bengelazo ingwalo njengoba i-curriculum asebeyenza isesentsha,” kutsho Nguluvhe.
Uqhubekele phambili esithi ezinye ingwalo zivele kuNkosikazi Dlamini oseHarare Institute of Technology owake wasebenza enyuvesithi yeZimbabwe Open University.
Isikolo seSt Mary’s Secondary sinikwe ingwalo ezingu-200, iBeitbridge Government inikwe ezokubala ezingu-150 lezokubhalela ezingu-50. Ugatsha lwezemfundo lona luthole ingwalo ezingu-400 okubikwa ukuthi zizafakwa eziphaleni zezingwalo.
Uphethe ngokuthi khathesi uhlose ukuthi ancedise njalo abemfundo yaphansi ngokufanayo.
Online Reporter