Baqina nge-soya beans eAlice Dam

Mthokozisi Dube
KULANDELA ukungani kuhle kwezulu lonyaka abalimi bepulazini le-Alice Dam eNyamandlovu  sebebike ukuba sebeqalisile ukulima i-soya beans ukuze bathole okokudla kanye lokuthengisa.
Abalimi bepulazini leli balime indawo engaba ngamahekitha angu-22 njalo baphathiswa yikhomithi yakule indawo yona ebahlomisa ngolwazi lokulinywa kwesilimo lesi.

Inengi labalimi abalima kule insimu ngamalunga eZimbabwe Commercial Farmers Union (ZCFU).

UMnumzana Majaha Mabhena ubike ukuba ukuswelakala kwezulu kwenze baqala ukulima i-soya beans ukuze benelise ukuthola ukudla kanye lemali nxa bangathengisa.

Loba nje belesifiso sokulima indawo enkulu abalimi laba bahlangana lohlupho lokuswelakala kwamanzi ngoba okwamanje insimu le isebenzisa izibholane ezimbili kukanti ezinye ezimbili zifuna ukuvuselelwa.

“Ukulima lesi isilimo bekungalula ngoba  phansi bekomile, kungakho ithalakitha ibisehluleka ukulima okwabangela ukuthi siqale sithelele,” kuveza uMnu Mabhena.

Uqhubekele phambili ebika ukuba uhlupho lwamanzi luyababisela emuva njengabalimi.

“Sikhangelele ukuziphilisa ngokulima kodwa ukuswelakala kwamanzi kwenza silime indawo ezincane,” kuveza uMnu Mabhena.

UMnu Mabhena ubike njalo ukuthi badinga imali yokuvuselela izibholane leyokuthi baqhatshe ithalakitha  ngoba layo iyabhadalwa.

“I-ZCFU isiqoqele imihlangano eyiyo eyenze senelisa ukulima i-soya beans ngoba kungokokuqala ukuthi silime lesi silimo lapha.

“Inhlanganiso le yasincedisa ngamafethalayiza, impahla yokuthelela kanye lolwazi lokuthi isilimo lesi sivunwa njani,” kubika uMnu Mabhena.

UMnu Mabhena uphethe ngokunxusa abenelisayo ukuba bancedise ukuze insimu le ithuthukiswe ngoba abalimi bekhanya bezimisele emsebenzini wabo.