admin
Thokozile Mbedzi
ZISETHUKILE izakhamizi zeGeorge Silundika ePlumtree kulandela ukubhudlukela kosane oluleminyaka emibili phakathi kwe-septic tank ludlala.
UMthunywa uzwe ukuthi usane lolu oluleminyaka emibili beludlala labanye abantwana komakhelwane luze luwele phakathi kwe-septic tank le mhlaka 7 kuyonale inyanga.
Omunye umfakazi oqotho uNkosazana Deliwe Tshuma uthe lamanje basethukile ngabakubonileyo.
“Abantwana bebezidlalela phandle komakhelwane ukuthi usuke wehlukana labanye njani lathi asikwazi ngoba abanye abantwana yibo abakunanzelelayo ukuba umntwana kabasamboni yikho ukwazisa unina laye waphanga bancedisana ukumdinga.
“Omama bahle baqoqana yikho ukumdinga. Bathe sebekomunye umakhelwane wabo yikho lapho abahlangana lenkemenkeme le.
“Bathola umntwana esewele ku-septic tank njalo esekhanya ngenyawo. Lokhu kwadanisa umuntu wonke silapha silusizi,” kuchasisa uNkszn Tshuma.
Isikhulumi samapholisa esabelweni seMatabeleland South ulnspector Loveness Mangena ebuzwa ngodaba lolu uvumile wathi solufikile ehofisini yabo kungakho bakhuthaza uzulu ukuthi ahlale eqaphele abantwana ngaso sonke isikhathi.
“Sichwayisisa udaba losane oluleminyaka emibili oluwele phakathi kwe-septic tank sithanda ukuthatha lelithuba ukuthi sixwayise abazali ukuthi bahlale beqaphele abantwana lapho abadlalela khona ukuze kulondolozwe impilo,” kuphetha ulnsp Mangena.
Online Reporter