admin
SIKHONA isitsho sayizolo esithi imali yimpande yesono yikho mhlawumbe loJudas wathengisa indodana kaNkulunkulu ngenhlamvu zesiliva. Lo Ananiya lo Safira bafihla enye imali, akukho muntu ongayithandiyo imali.
Kunjenje kuphilwa ngayo, kodwa bakhona abayithanda kuze kwedlulise amalawulo.
Uyakunanzelele emigwaqweni uthola umuntu etshayela imota yakhe ethwele abantu engelazo incwadi zokuthi athwale abantu njalo lemota yakhona iyisikorokoro esabonwa ngomunye umhlabeleli weNingizimu Afrika, uzwa bethi emapholiseni sizadlula bathandimali, lakanye ufika nje umtshayeli akhiphe okuzindibilitshi adlule, noma nje ingalungelanga ukuthi idlule, kungaba kusemfuleni okucatshwa khona okungekho emthethweni kuyiwa kwamanye amazwe bakhipha yona imali bachaphe bengagqize qakala.
Lezifuyo ezitshontshiweyo kukhitshwa zona inhlamvu zesiliva zidlule, ziyebulawa emadolobheni umnikazi asale edinga inyawo zize zingene esiswini.
Mina ngombono wami ngithi sonke sithanda imali, hatshi amapholisa wodwa ngoba nxa uqalisa uhambo lwakho ukwazi mhlophe ukuthi awulancwadi ezifanele usiyadinga imali, lawe uyabe uyithanda, kuba kubi nxa sekuthe kwavela ingozi kwatshona abantu sekumele wena mninimota engela malungelo ukhokhele indleko zengozi, njalo lamapholisa ayabe esekubopha, kujuluke umsisila endodeni, ukuhlakanipha kukanogwaja kuphele du.
Ufice umuntu esafanana lofudu ocatshela ukutshisa kwelanga likaMpandula phezu kwamadwala ethembe ukuzembathisa ukhakhayi lwakhe.
Minengi imithetho efakwa nguHulumende ezama ukwenqabela lokhu lalokhuya kodwa umuntu lepholisa ngenxa yokuthanda imali bephula umthetho sekungani ngokungokhekhe kusephulelana amalunga emfe ngesikhathi sehlobo kuvela esikolweni.
Ngiyangizwe okungonkunzi kusithi ngenkulumo yakulezi nsuku lapho okulepholisa kulemali. Imithetho yelizwe igotshwa njalo nje kuthenjwe khona ukuthi kuzathiwa amapholisa athandimali.
Ayixabene .
Umlobi ungamthinta ku: 0714355641
Online Reporter