admin
Ethel Ncube
ZISAKHAKHAMELE izakhamizi zeBattlefield eMbembesi kulandela ukumanyana kwamadoda amahlanu atshaye abulala enye indoda ngemva kokuyikhanda ibhinya inja.
USifelani Nkomo oleminyaka yokuzalwa engu-36 ufe ngeviki ephelileyo ngemva kokutshaywa nguMduduzi Ncube, Gerald Lunga, Nhlanhla Ncube loRichard Sobantu kanye lomunye olokhu engakabanjwa kulandela ukukhandwa ebhinya inja yomunye wabo.
Ekhuluma loMthunywa umfakazi oqotho uSimiso Nyathi uveze ukuba uNkomo wakhandwa esemzini wakhe ebhinya inja kamakhelwane okwabangela ukuthi umnikazi wayo kanye labanye abane bambhaxabule ngezidindi zamahloka okwabangela ukuthi afe andubana bahlasele lenja yakhona.
“Kukhanya uNkomo ubevele eselomkhuba wokuhlala ebhinya inja le okokuthi ubeseyibona njengomkakhe. Lenja yakhona layo ibivele ikhanya ukuthi isijayele ukubanjwa ngale indlela ngoba yayikhanya ingahlukuluzekanga ngokwakusenzakala kuyo,” kulandisa uMnu Nyathi.
UMthunywa uzwe ukuthi ukhona onguye owaqala ukubona uNkomo ebhinya inja le wasesiyabikela umnikazi wayo.
“Owaqala ukubona isenzo lesi waphanga wayabikela umnikazi wenja onguye owaqoqa abanye bahle bayasusela uNkomo amanqe.
“Bathi befika bezibonela ngawabo amehlo kabazange babe besambuza lutho kodwa bahle bamhlasela ngemphini yamahloka ababeyiphethe,” kuchaza uMnu Nyathi.
Abasolwa bamiswe emthethwandaba weTredgold ngoLwesibili kuyonale iviki besetheswa icala lokubulala njalo bazaphenduka mhlaka 4 Lwezi.
Online Reporter