admin
Thokozile Mbedzi
INKAMPANI kaLoliwe iNational Railways of Zimbabwe isihlele izitimela ezizathwala uzulu mahala ngoLwesihlanu esiya eHarare kumkhankaso weSouthern Africa Development Community (Sadc) Solidarity Day wokulwisa ukususwa kwezijeziso zomnotho.
Kubikwa sokubekwe eceleni izitimela ezimbili ezizathwala abantu besuka koBulawayo leMutare kungela mbadalo.
Isikhulumi sakoLoliwe uMnumzana Nyasha Maravanyika uthe isitimela sizasuka koBulawayo ngoLwesine ngehola lesithathu ngemva kwemini.
“Isitimela sizasuka koBulawayo ngoLwesine mhlaka 24 Mfumfu ngehola lesithathu emini siyefika eHarare ngoLwesihlanu mhlaka 25 ngehola lesine ekuseni.
“Isitimela sizaphenduka ngemva komkhankaso ngehola lesificaminwe mibili ntambama sifike koBulawayo sokulanda ihola lesificamunwe munye ekuseni. Isitimela esizasuka eMutare sona sizasuka eMutare mhlaka 24 Mfumfu ntambama ngehola lika-9 sifike eHarare ngehola lesithupha ekuseni. Isitimela sizahamba sisima ezilindweni ukuze sithwale abantu abaya kumkhankaso lo,” kuchaza uMnu Maravanyika.
Uqhubekele phambili esithi labo abafisa ukusebenzisa ithuba leli bangaxhumana labaqondisi bezilindweni zezitimela lezi.
“Labo abafisa ukuhamba kungelambadalo ngesitimela bangaxhumana lamaStation Masters ezindaweni eziseduzane labo ukuze bathole umbiko ngokugcweleyo. Isitimela esivela koBulawayo kukhangelelwe ukuthi sithwale abantu abangu 1 500.
“Kukanti esizavela eMutare sona sikhangelelwe ukuthwala abantu abangu-1 200 kuma-coaches angu-12,” kulandisa uMNu Maravanyika.
Uphethe ngokuthi inkampani kaLoliwe ithatha isinqumo sokuphathisa lokuphatheka kunhlelo ezinengi zelizwe njalo kusikhathi esedluleyo ibithwala abantu kumikhosi efana leyokujabulela uZibuse kanye lowokukhumbula amaqhawe akuleli.
Online Reporter