admin
Nkosilathi Sibanda
SEKWALAHLWA inhlonipho kwabafileyo elokitshini leMadumabisa edolobheni leHwange lapho osokuvele ukuba abantu sebetshontsha izitina ezakhele amathuna.
UMthuywa uthole imfanekiso evela kulindawo etshengisa indlela amasela asebhidlize ngayo amathuna etshontsha izitina.
Izitina lezi, ezaziwa ngokuthi yiWankie Brick, kubikwa ziqinile njalo zifunwa ngamankampani thile akubhizimusi lokwakha.
Abafakazi abaqotho abahlala kulelidolobho bathe ukwanda kwezakhiwo sekudale ukuthi abantu badinge lezi izitina loba ngaphi.
Izitina lezi azisaphekwa kulezinsuku njalo azisatholakali ezitolo.
Ngokudingisisa udaba lolu, intatheli zithole ukuba amasela ezitina la angena emangcwabeni ebusuku.
Izakhamizi ezikhulumisane loMthunywa ziveze ukuthi ngoLwesihlanu ngeviki edluleyo bagijimise amasela amathathu atholakale edonsa inqola egcwele izitina.
“Sikhuluma nje simadolonzima ngesenzo sabantu laba. Ngeviki edluleyo sitshayisane lamadoda amathathu efuqa inqola elezitina lezi. Aphange acela ezinyaweni esebuzwa ukuthi azithethe ngaphi,” kutsho uMnumzana Bothwell Nyoni oyisakhamuzi selokitshini leMadumabisa.
“Okulusizi yikuthi abantu laba basuka badelele abafileyo ngokugijimisa imali. Izitina lezi bazithengisela labo abakha izindlu emalokitshini amatsha.”
UMthunywa uxhumane loMqondisi wenhlanganiso ye-Greater Whange Residents Association uMnumzana Fidelis Chima othe okunje abakaze bakubona.
“Akukhulumeki lokhu. Yimihlo engasitshiya sisebunyameni kwelakusasa. Kuyadanisa ukuthi izakhamizi yizo ezitshontsha izitina emathuneni. Thina njengabantu abamnyama sikwazi ukuba amathuba ayahlonitshwa njalo akusindawo yokudlalela.
“Kusegcekeni ukuthi laba abantu abatshontshayo bayazithengisa izitina lezi. Kudingwa imali ngendlela engayisiyo.
Inhlanganiso yeGreater Whange Residents Association isicele inkokheli zomdabu ukuthi zilungisise loludaba kungakonakali emangcwabeni.”
UMnu Chima uthe sebenanzelele ukuba loba kulihlazo ukutshontshwa kwezitina, okusuka kufuqe abantu beHwange ukuthi batshontshe yindlala.
“Akulamali kulindawo. Imisebenzi ayikho ngakho amasela adanela kukho konke abangakuthola ukuze baphilise imuli zabo. Kodwa akusinto enhle le.”
Esinye isakhamuzi uNkosikazi Linette Njiva ubikele uMthunywa ukuba amasela asebenza lezakhamuzi njalo sekwande abantu abangaziwayo ukuthi bavela ngaphi kulindawo.
“Sesihlala labomakhelwane esingabaziyo. Bafika lapha bengene ezindlini ezingela bantu. Yibo amasela la.
Basebenzisa izakhamizi ukuze bakwazi lapho okutholakala khona izitina leyinye impahla elemali,” kutsho uNkkz Njiva.
Ilokitshi leMadumabisa lingaphansi kwenkampani yeHwange Colliery njalo kuhlala inengi lezisebenzi zalinkampani.
Sekuleminyaka ethile inkampani le inganikezi izisebenzi zayo iholo elaneleyo.
Iphephandaba likazulu lizame ukuxhumana lomphathi wezakhiwo e-Hwange Colliery uMnumzana Petersen Ncube kwehlula. Isikhulumi salinkampani uNkosikazi Rugare Dhobbie kazange aludobhe ucingo ngoLwesithathu emini.
UMnu Chima uchaze ukuba imuli ezilezihlobo ezafihlwa emangcwabeni aseMadumabisa sezihlasele inkampani yeHwange Colliery ukuthi kungani ingaqhatshi onogada abazalinda lindawo.
Online Reporter