admin
Thokozile Mbedzi
Kulenina le Hillside koBulawayo eligcwalise inkulumo yokuthi koBulawayo kukomfazi itshaya indoda, kulandela ukutshaya umkalo ngesitulo lembiza andubana litshise indlu.
UMildred Goba oleminyaka engu-27 yokuzalwa kubikwa uxabane lomkakhe ngoMvulo kuyonale iviki andubana amhlale amadundulu amtshaye ngesitulo lembiza andubana atshise indlu.
Kubikwa ngesikhathi indoda isiyabikela amapholisa ukuthi itshayiwe uGoba yikho lapho asala etshisa indlu.
Ekhuluma lentatheli kaMthunywa uNkosazana Zodwa Nkiwane omunye walabo ababona inina leli selitshaya umkalo uthe lokhe betshe amathe ngamandla kaGoba.
“Lokhe simangele ngesenzo sikaNkszn Goba sokutshaya umkakhe ngesitulo langembiza watshisa lamasofa ngemva kokuxabana lomkakhe.
” Umkakhe wabaleka waya emapholiseni uthe ephenduka wayitshaya futhi ngenqindi langamampama indoda yaphinda yacela futhi ezinyaweni yabuyela emapholiseni,” kulandisa uNkszn Nkiwane.
Kubikwa ngesikhathi indoda le isibuyele okwesibili emapholiseni uNkszn Goba yikho lapho asala esetshisa indlu.
Kubikwa abe Fire Brigade benelisa ukucitsha umlilo kodwa impahla yonke yendlini yatshabalala.
Isikhulumi samapholisa koBulawayo uInspector Abedinico Ncube ebuzwa ngodaba lolu uthe solufikile ehofisini yabo.
“Amapholisa akoBulawayo athanda uxwayisa uzulu ukuba kaxazulule ingxabano abayabe behlangane lazo ngesihle kulo kwenza udlakela,” kutsho ulnsp Ncube.
Online Reporter