Bayahamba abadlali kuBosso

 

Nkosilathi Sibanda

I-HIGHLANDERS FC isiveze ukuthi enye yezinkinga ezinkulu ebhekane lazo yikuphela kwezivumelwano zabadlali abanengi. Kubikwa kuzaphela izivumelwano zabadlali abangu-34 kuminyaka emibili ezayo.

Kumbiko owethulwe ngumsekeli kamgcinisihlalo weqembu, uSifiso Siziba, emhlanganweni we-Extraordinary General Meeting (EGM) ngeSonto, kuvezwe ukuthi izivumelwano zabadlali abangu-14 zizaphela ngoMpalakazi 2026, kuthi ezinye ezingu-20 ziphele ngoMpalakazi 2027.

“Ukuqinisekisa ukuthi abadlali bahlala belezivumelwano eziqinileyo kumele kulungisiswe ngokuphangisa,” kubike uSiziba.
Umbiko wakhe uphinde waveza ukuthi labaqeqetshi badinga ukusekelwa ukuze bathuthukise ulwazi lwabo, njengoba abanye bebhadala izifundo zabo ngemali yabo.

Uveze ukuthi umqeqetshi uMelusi “Mabaleka” Sibanda, uyazibhadalela izifundo zeCAF B Coaching Licence.
Iqembu liphinde lavuma ukuthi kalilayo imitshina yakulezinsuku eyeneleyo yokuhlaziya ukusebenza kwabadlali, efana leGPS tracking system lemitshina yokuhlola ukusebenza kwabadlali.

“Kudingeka ukuthi sikhangelisise indlela yethu yokudlala, sifake indlela zokuhlola ukusebenza kwabaqeqetshi labadlali, njalo siqinise indlela yokubhalisa abadlali abatsha.”
Kubikwa kuyadingeka njalo kuqembu leHighlanders ukuthi kuthuthukiswe inhlalakahle yabadlali ngokubanika ukudla okuhle, ukuqinisa indawo zokuzilolonga, indlela zokuphumula ngemva kwemidlalo.