Online Reporter
YiNtatheli kaMthunywa
OWESIFAZANA weShackleton, endaweni yezimbamgodi, uthi umabonakude wakhe owayetshontshiwe waphenduka ngemva kokuba evakatshele inyanga eyamnika umuthi wokuthi isela elamtshontshelayo lihlaselwe zinyosi andubana liphendukise impahla le.
Kulevidiyo yalelisela selinamathelwe zinyosi ezinengi emzimbeni wonke esabalale kunkundla zokuxhumana ngeviki ephelileyo
Kulividiyo kubonakala njalo abantu abanengi bethatha amavidiyo ngomakhalekhukhwini, indoda ifihle ubuso, bonke besithi lisela.
UNkosazana Tracy Munyaradzi (45), ongumnikazi kamabonakude owebiweyo ugcizelele ukuthi okwabonakala kuvidiyo yikho okwenzakalayo sibili.
Uthe umabonakude wakhe webiwa ngoMgqibelo weviki ephelileyo ngemva kokuba yena lemuli yakhe bephume besiya emkhosini wokukhumbula umnewabo womkakhe owabhubhayo.
“Sithe siphenduka ekhaya sathola umabonakude wethu engekho. Kwacaca ukuthi wayetshontshiwe,” kutsho uMunyaradzi.
Uthe udadewabo omncane, uGrace, wathi kungcono badinge inyanga ngoba ekholwa ukuthi ingabasiza ukuthola impahla yabo.
“Safonela inyanga yavuma ukuza ngalelolanga ngehola lesihlanu ntambama,” utsho njalo.
“Yangena endlini, yabamba isandla somkami yasicela ukuthi atshengise lapho okwakuhlezi khona umabonakude.
“Yasicela umlotha, yawutshisa endlini yase isitshela ukuthi siyinike amalanga amabili ukuze ithumele abantu bayo ukuyabamba isela.”
UMunyaradzi uthe ngoMvulo akuzange kube lalutho olwenzakalayo.
Kodwa ngoLwesibili, sekungabo-11 ebusuku, bathi bezwa indoda ikhala phandle kwendlu yabo icela uncedo.
“Ekuqaleni sasicabanga ukuthi ngumuntu owayecela uncedo esitolo sotshwala esasiseduze, kodwa waqhubeka ekhala esincenga ukuthi siphume simsize,” kutsho yena.
Uthe indoda le yayihamba labanye abantu ababili.
“Besingezwa amazwi abantu abathathu phandle. Sayibuza ukuthi ngubani kodwa yaqhubeka isicela ukuthi siphume.”
Uthi umkakhe evula umnyango wethuka kakhulu.
“Wabona indoda iphethe umabonakude wethu, kodwa igcwele inyosi emzimbeni.”
“Yayikhala isithi: ‘Sengihluphekile. Bengifuna ukuyathengisa i-TV lapho inyosi ezivele zangihlasela khona. Ngicelani lingisize. Sengibuyise i-TV yenu.’”
UMunyaradzi uthe umsolwa wabatshela ukuthi wayesehambise umabonakude eLion’s Den ngenhloso yokumthengisa.
“Akula esasingakwenza ukuthi simsize. Wayethi nxa ehlala phansi, inyosi ziqhubeke zimhlasela ekhanda, entanyeni lasemhlane.”
Uthe wafonela inyanga eyafika sekungabo-2 ekuseni.
“Inyanga yaqala ngokukhumula izicathulo zendoda. Yase izama ukuthatha umabonakude kodwa yehluleka ekuqaleni,” utsho njalo.
“Yafafaza umuthi ezandleni zomkami, yamtshela ukuthi abambe umabonakude, kwasekusiba lula ukumkhulula ezandleni zikamsolwa.”
Ngemva kwalokho, inyanga yathatha umsolwa yamusa lapho esebenzela khona, isithi izamkhulula ekuhlaselweni zinyosi.
Inyanga itshele iphephandaba le-H-Metro ukuthi: “Ngemva kokubamba umsolwa, yena lomnikazi kamabonakude bahlala phansi baba lesivumelwano.
“Umsolwa wabhadala imali esasiyifuna ukuze udaba luphathwe emthethwandaba wethu.
“Ekucineni samkhulula ngoba izinhlangothi zombili zase zivumelene.
“Nxa sibamba isela, inhloso yethu yikuthi udaba luxazululwe ngendlela eyamukelwa ngumuntu wonke.
“Nxa onelweyo efuna ukubhadalwa inhlawulo njalo bonke bevumelana, yikho esincedisa ukuthi kwenziwe.
“Kodwa nxa efuna ukuthi udaba luye emapholiseni njalo umsolwa abotshwe, leso yisinqumo sakhe.”
