Online Reporter
Bongani Ndlovu
ILUNGA lekomithi yeHighlanders elibona ngezemali eqenjini, uNkani Khoza, seliveze ukukhathazeka ngabalandeli lamalunga angena enkundleni engabhadali.
Ekhuluma emhlanganweni we-Extraordinary General Meeting (EGM) ngeSonto, uKhoza uthe iqembu lilahlekelwa yimali enengi ngenxa yalokhu.
“Nxa lisithi kulemali enyamalalayo kumele litshengise ukuthi inyamalalela ngaphi. Thina asilayo inkinga yokuntshontshwa kwemali. Yonke imali yeqembu siyenelisa ukuyilandelela,” kutsho uKhoza.
Uthe iqembu lilahlekelwa yimali ngokungena kwabantu eBarbourfields bengathenganga amatikiti.
“Ukulahleka kwemali kusemagedini enkundla. Amalunga labalandeli yibo abehlisela iqembu imali,” kutsho uKhoza.
Uveze ukuthi emidlalweni eminengi iziphathamandla zeqembu zibamba abantu bezama ukungena enkundleni mahala.
“Abanengi phakathi kwamalunga ethu labalandeli bazama ukungena bengabhadalanga. Nxa ungena ungabhadalanga, ulindele ukuthi iqembu lithole ngaphi imali?” kubuza uKhoza.
Uphinde wagcizelela ukuthi amarekhodi emali zeHighlanders acacile, wanxusa loba ngubani osola ukuthi kulemali enyamalalayo ukuthi alethe ubufakazi.
“Nxa kulemali enyamalalayo sizayibona. Ngakho nxa ulobufakazi kumele ubuveze.”
Amazwi kaKhoza afike ngesikhathi amalunga eBosso exoxa ngesimo semali yeqembu, ngemva kokuba umbiko uveze ukuthi izikwelede zeHighlanders sezisedlula impahla elazo.
