admin
YiNtatheli kaMthunywa
ILIGI yomdlalo wokuqaga eye-Glow Petroleum Rainbow Amateur Netball League isikhukhumeze ukuzethemba kubadlali bamaqembu ayisitshiya galombili adlala kuligi le lonyaka.
Imidlalo iqhuba kuhle kulandela ukuvulwa kwesizini, okuyikho okujabulisa lonobhala wayo uMoses Gukumere.
Unobhala lo uthe sebenanzelele ukuthi abadlali bamaqembu amanengi bazimisele ukuthi badlale isizini ize igqitshwe. Iligi le iphiwe usekelo lwezigidi zemali yinkampani yamafutha eye-Glow Petroleum.
“Imidlalo iqhuba kuhle. Sibonga lokuzimisela kwamathimu ethu,” kutsho unobhala lo.
Kumaqembu amatsha akhanya ethole ikhaya elihle kuligi yeRainbow Amateur Netball League, yi-Khami Queens yakoNtuthu.
Ithimu le esanda kuchinsa ukutshibilika kunkundla lezi, ibika ukuba ikhangelele ukuthi ikhuze uvalo kubadlali ukuthi benelise ukudlala bekhululekile.
Odade laba abasekelwa lugatsha lwamajele iZimbabwe Prison and Correctional Services, bacine ukudlala emncintiswaneni yaphezulu ngesizini ka-2017.
Ekhuluma lentatheli kuliviki, umqeqetshi weKhami Queens uIrvin Zimbizi uthe ekubunjweni kweqembu lakhe, wakubona kufanele ukuthi akhulise labadlali abatsha.
UZimbizi ukhulume ngokuzethemba okukhona enkambeni yakhe ngemva kokunqotshwa kumdlalo wakuqala wesizini bedlala leqembu leNgezi.
“Bekuyisiqalo sohambo lwemidlalo yethu kuligi. Singabe sinqotshwe kumdlalo wakuqala kodwa siphethe ithemba sibheke phambili,” kutsho umqeqetshi lo.
Uthe umdlalo lo ubavule amehlo, babona amaphutha abawenzileyo.
“Ngilabadlali abakade beqabuka ukuncintisa kuligi ephezulu. Bakhuze uvalo kwangakhanyi ukuthi bayaqalisa ukudlala.
“Umdlalo wakuqala usitshengise lapho ebesiyekethisa khona. Kubadlali bami ngithi badlale kuhle sibili. Kukhona okuncinyane okumele sikuqaphele nje,” kutsho lumqeqetshi.
Online Reporter