Online Reporter
Dalyn Chigwizura
IZIGEBENGU ezintathu ezazihlasela abantu ngamabhemba koBulawayo, zize zajeziswa nanko zizakuyapika ejele iminyaka engu-72.
Bobathathu laba bathole isijeziso sabo ngoLwesine, bemiswe emthethwandaba weWest Commonage.
Izigebengu lezi nguLeeroy Sibanda (19) oweMzilikazi, Nkosilathi Dhlamini (25) oweNkulumane loNtandoyenkosi Nyoni (35) oweCowdray Park bebe lomkhuba wokucathamela abantu endleleni ezedlula egangeni, besethusela ngokubaquma ngamabhemba, kwesinye isikhathi basebenzise amahloka lengqamu.
Bebetshontshela abantu imali, impahla lakho konke abangakuthola.
Bagwetshelwe amacala amabili obugebengu ngumantshi uNkosikazi Sibongile Marondedze ubanikeze iminyaka engu-24 ejele, kodwa wehlisa emihlanu, endaweni yokuthi beziphathe kuhle.
Ebagweba, uNkosikazi Marondedze uthe: “Abasolwa laba bahlukuluza izakhamizi zeNtumbane bacina sebebizwa ngokuthi ‘Ngabafana bamabhemba’. Kumele bapike okuzwayo ejele ukwenzela ukuthi kube ngumzekeliso kwabanye.
Umtshutshisi wodaba, uMnumzana Milton Moyo utshele inkundla ukuthi mhlaka 24 Mabasa 2025, ngehola lesihlanu ntambama, uKenneth Ncube loVusani Sibanda babebutha ubulongwe benkomo lapho okuhamba khona isitemela eNtumbane, ngesikhathi behlaselwa liqula labafana bamabhemba.
UNcube bamtshaya esandleni, kwathi uSibanda esithi uzama ukubaleka, bambamba, bahlaliswa phansi bobabili.
UNcube bamkhipha izicathulo, ibhanti lejazi, wathathelwa lefoni. Ngemva kwesikhatshana, kwabanjwa inkunzi uSimbarashe Ndlovu owayezihambela kulindawo. Bamcela igwayi ikanti bahlose ukumtshaya, bamthathela ifoni yeSamsung, iUS$40,
R200, isaka lamagwili lesinkwa.
Amapholisa enelisa ukwenza uphenyo, abopha uNyoni eCowdray Park lapho okwatholakala khona elehloka elincinyane ngaphansi komqamelo. Nguye owacina eseqamba ezinye izigebengu asebenza lazo.
