adminKUDABA okunathiswana ngalo uhwithwayo esiqintini seMatankeni eNyamandlovu, kulenina elidabuka eDliwampondo eTsholotsho elibanjwe xhaka libhunyumunyu komunye umuzi ligade inja.
Inina leli elingaziwayo esigabeni lesi elivela esiqintini esingaphsni kukasobhuku Masala khonale eTsholotsho duzane lakoMathe kubikwa litholakale ligade inja le emadabukakusa ngoLwesibili kuyonale iviki.
UMnumzana Mlamuleli Moyo ongumnikazi womuzi lapho okwatholakala khona inina leli, uthe lokhe ethithibele ngesenzo lesi njalo simthena amadolo.
“Ngezwa izinja zikhonkotha emadabukakusa ngoLwesibili kodwa angizange ngiphume phandle. Ngalunguza ngefasitela ngabona inina leli linqunu seliquthe entubeni yomuzi.
“Ngesaba ubunqunu balo ngoba kuzathiwa ngilibambe iganyavu ngakho ngavusa abantwana abangamantombazana.
“Abantwana bamlanda bamthola egqoke isudu yakhe yokuzalwa. Abantwana bathi wayequthe phezu kwenja le eyayincinyane. Ngavusa omakhelwane sambuza ukuba udingani emzini wami wachaza ukuba wayevela eTsholotsho njalo ulahlekile ubezama ukuya esambuzini. Waveza ukuthi kakwazi ukuba wayefike njani emzini wami,” kuchaza uMnu Moyo.
UMnu Moyo uqhubekele phambili wathi ubona angani inina leli lingumthakathi ngoba akulamuntu ongasuka eTsholotsho enqunu.
“Kusobala ukuba inina leli lalizoganga emzini wami ngoba lehla phezu kwenja ngoba selibona abantwabami belilanda.
“Lokhe ngathwetshulwa yingwe angikaze ngibone isimanga esinje kodwa sengihlezi ngizidla amathambo engqondo ngoba ngingazi ukuba inina leli lalivele lijongeni emzini wami,” kuchaza uMnu Moyo, Usobhuku walindawo uMnumzana Thamsanqa Makhosini Ncube uthe kuliqiniso ukuba inina leli labanjwa ligade inja.
“Ngabizwa nguMoyo ekuseni ethi ngizobona umhlola owawusemzini wakhe. Kwakulenina elalihlezi phansi likhothamise ikhanda ngenhloni ngoba lize. Inja yayisitshotshobele layo eceleni njalo kukhanya ukuba idiniwe.
“Kusobala ukuba inina leli lalizoganga ngoba ukusuka eDliwampondo uzofika eNyamandlovu kungumango. Lanxa ezama ukuvika ngomunwe kusobala ukuthi wabuya egade inja le. Sacina simhambisa emapholiseni eNyamandlovu,” kulandisa uSobhuku uNcube.
Online Reporter