Online Reporter
Victor Maphosa
USOMABIZIMUSI uWicknell Chivayo (43), lomkakhe uLucy “Lulu” Muteke, labanye abantu abane bafe kungozi yendizamtshina eMarondera Rural, esabelweni seMashonaland East ngoLwesithathu ntambama.
Indizamtshina ebilabantu abayisithupha iwe ngehola lika-5 ntambama epulazini eliseduze le-Waddilove Mission.
Iziphathamandla zikaHulumende ziqinisekise ukuthi akula muntu osinde engozini le.
UNobhala kugatsha olubona ngezokukhitshwa kwembiko uNick Mangwana uqinisekise ngengozi le.
“UHulumende uqinisekisa ukuthi kwenzakale ingozi yendizamtshina, lapho obekulomunye usomabhizimisi owaziwayo, labantu abahlanu phakathi.
“Ulwazi esilalo khathesi lutshengisa ukuthi akulamuntu osindileyo engozini le. I-Zimbabwe Republic Police izaveza amabizo abo ngesikhathi esifaneleyo. Sethula amazwi enduduzo emulini, abangane labo bonke abathintekayo kulesi sikhathi esinzima,” kutsho uMnu Mangwana.
Isikhulumi semuli uMnumzana Herbert Chivayo uthe:
“UWicknell Chivayo lomkakhe bedlule emhlabeni kulingozi,” kutsho uMnu Chivayo.
Isikhulumi samapholisa elizweni uCommissioner Paul Nyathi laye uqinisekise ngalesi sehlakalo.
“Indizamtshina iwe eMarondera Rural ngezikhathi zabo-5 ntambama. Indizamtshina le ibilabantu abayisithupha. Eminye imbiko mayelana lodaba lolu izakhutshwa ngesikhathi esifaneleyo,” kutsho uComm Nyathi.
Isizatho esenze indizamtshina iwe besingakatholakali ngoLwesithathu ebusuku.
*Udaba liyaqhubeka…
