Biga moyo mubutjilo

Desire Nkololo waBhanda
NDAKE ndili mbakidzani waTjebukani, ali mhandala yakatebamisa moyo zwayo. Ikotamisila n’holo whola nentjetjana.

Takakotjenama tiwha kuyi watjivun’wa gumbo nembisana waseli yelukoba. Wake atjintjentjana kuti engawana mwana. Mbisana wakawumbvuma nlandu, kwake kuli mazakhwa abake beta koga kukakobhuda nlandu. “Akuneni, mwana atolahiwa,” kwakaleba mayi baTjebukani.

Mimwedzi itjihhanakadzi koga Tjebukani wakalila nentumbu, bakasunga kotjikara kukalabukigwa kutjiwongelo, wakanotsibama mwana lubaka gusanu gwaswika (premature).

Mwana woyo wakayetiwa Ngoni. Ngoni wakakula alintukunusa koga, wose nhu waka etanga wumbona wake ebhuzwa makole awe nentha yezwilebo zwizwe. Ndakakubona kula kwaNgoni bo ndili nhu whola bo sebanhutana betjaba.

Wakati etjambohanganya gole lehhanandume bazwadzi babe bekatswila mun’umba bekatjinyika bose. Yah . . .wuni nyolo mumoto, wakalegwa nabokuku bagala bakwegula zwabo.

Wakahakana nedziwhuni ekasengana nemakabha edzivula, nzi wakabhakhwa nayiye. Bhata kukwe makole makumi anakubili wake abe nkadzimayi unoziba bhata nzi wose. Magwadzo . . . bokuku babe kakatjinyika gole ilelo, ngoni etjahingila makole egumi nekutatu, wakasala nembisana waka elisa n’ombe.

Mbisana wen’ombe wakanohinga kutjiKhuwa, Ngoni ekasala yega muzi,. Kukwele wake ebona muzwidiyo, wakalobogwa netitjara enamakole aligumi nekuhanu.

Hule kwemakole makumi ali pan’ha uwe waka palalana nenlume uwe, Ngoni wakadziyila kwegole akagwilo zwibulaya.

Kwakaswika maKhuwa aseli kwegungwa ekatogwa ekanozwidiya seli. Wakahanduka abe nkadzi unozwihinga.

Iko, Ndzimu ayesati kwapela akuzopela, mube nemoyo nlefu banhu batjetjana. Mulingisane nebutjilo gwenyu kene gulema.

Ngoni wakahangana nezwiliko kubvila hhuba lekutanga azwagwa esiwa mu-incubator; alintjetjanisa.

Nkololo waBhanda unoboka bana moyo nlefu wezwidiya Tjikalanga. Letjani ndizunguze Google yetjiKalanga.