admin
Cornelius Luphahla
KULOMFUNDISI webandla leZiyoni eNtalale eGwanda ogangade umkakhe ngamatshe wambulala ngoba emcabangela ukuthi uthandana lomngane wakhe ohlala kule indawo.
Isiga lesi senzakale ngoLwesithathu kuviki ephelileyo lapho uTsoanelo Sibanda agongode khona umkakhe uLetshani Ndlovu ngamatshe wambulala ngoba emsola ukuthi usethandana lomngane wakhe, uSipho Ndlovu.
UMthunywa ukhulumisane loMnumzana Qedani Dube omunye wabazalwane bakametheswacala wachaza ukuthi umkamfundisi lo ubeselesikhathi eside ethandana loMnu Ndlovu.
“UMaNdlovu ubeselesikhathi eside ethandana loNdlovu njalo thina sasihlala sibabona nsukuzonke behamba bonke besiya emzini wakhe ntambama nxa uSibanda engekho esemlindelweni.
Ngokubona kwami uSibanda laye wacina ezibonela ngoba akulamuntu obengakwazi lokhu.
“Kutsho ukuthi uSibanda uthe ekubona lokhu wezwa ubuhlungu kakhulu njengoba uNdlovu lo obeganga lomkakhe engumngane wakhe njalo engumzalwane futhi ebandleni,” kutsho uMnu Dube.
Uyise kaSibanda, uMnumzana Isaac Sibanda ebuzwa ngale indaba uchaze ukuthi uzwe sokungumsindo ebusuku bathi besiya khona bathola umalukazana esefile.
“Thina sithe silele sezwa umsindo emzini womntanami savuka labantwabami saqonda emzini wakhe sathola umalukazana sefile ngemva kokutshaywa ngumkakhe ngelitshe ekhanda.
“Sathi simbuza ukuthi kungani ebulele umkakhe kazange wasiphendula sasesibiza amapholisa azombopha.
Ngikhuluma nje usemapholiseni eGwanda.
“Ngilapha ngizwa ubuhlungu ngesiga esehlele umntanami njalo lokhu sisadingisisa ukuthi bekutheni aze abulale umkakhe.
Asazi kumbe ufikelwe yikusangana emkhumbulweni, engxenye kumfikele yikho ephethe ebulele umkakhe,” kuchaza uMnu Sibanda.
UKhansila wakule indawo uMnumzana Coaster Ndlovu ubikele intatheli ukuthi indaba le uyizwile kodwa kakwazi ukuthi kuhambe njani.
“Kuliqiniso sibili ukuthi uTsoanelo Sibanda ukhande umkakhe ngamatshe wambulala kodwa okwakhathesi kangikezwa ukuthi kungani embulele,” kuphetha uKhansila uNdlovu.
Imizamo yokukhulumisana lesikhulumi samapholisa esabelweni seMatabeleland South yehlule.
Online Reporter