adminNcekwenhle Ncube
ZIKHALA ezimathonsi izakhamizi zeDwaleni esigabeni seNyamandlovu kulandela ukufelwa zinkomo zilandelana kulandela ukudla umkhawuzane eviki edluleyo.
Intatheli ibikelwe ukuthi sekulenkomo ezidlula itshumi esezifile kulandela ukudla umkhawuzane kwamanye amadlelo abucwadlana lendawo le nanko phela kuleyondawo utshani sebuhlumile kulandela ukuna kwezulu.
UMnumzana Khayisa Dube uchazele iphephandaba ukuthi inkomo lezi zadla umkhawuzane kwenye indawo eseduzane lomgwaqo osuka koBulawayo usiya eVictoria Falls, yayibiyelwe ngoba kulomkhawuzane omnengi kuleyondawo.
“Izakhamizi zafica inkomo zazo kule indawo zaziqhuba zizisa emizini yazo kodwa ngokuswelakala kwenhlanhla kwafika kwafa inkomo ezilitshumi lanye.
“Lokhu kwabangelwa yikuthi inkomo edle umkhawuzane akumelanga itshitshiswe ngoba zisuka zidinwe inhliziyo ime ukumpompa igazi,” kutsho uMnu Dube.
UDokotela wezifuyo uPollex Moyo ubikele abalimi ukuthi nxa inkomo zidle umkhawuzane akumelanga zihambe umango omude. Ubuye njalo wabeluleka ukuthi kumele zingatshitshiswa ukuze igazi lingatshayi ngamandla ngoba kuyahlukumeza inhliziyo.
UDkt Moyo uphinde njalo wacebisa izakhamizi ukuthi nxa inkomo zingadla umkhawuzane bazivalele zinganathi amanzi.
“Okunye njalo okungaphathisa ukuvikela inkomo ezidle umkhawuzane ukuthi zingafi yikuzincitsha amanzi okwamalanga.
“Abalimi bangathatha njalo amalahle ephane bawahlanganise lamanzi bezinathise,” kuchaza uDkt Moyo.
Uphethe ngokucebisa uzulu ukuthi babiyele indawo ezilomkhawuzane ukuze izifuyo zabo nxa zithe zaduha zayalapho zingawudli.
Online Reporter