admin
Thokozile Mbedzi
INHLANGANISO ebona ngezokulima eyeAgritex esiqintini seMashava eMasvingo iphakathi kohlelo lokufundisa abalimi indlela eyiyo ezakwenza bathuthukise isivuno sabo kanye lokudla esiphaleni sesizwe.
Kubikwa abalimi endaweni bafundisa abalimi indlela yokwehlukanisa izilimo zabo nxa belima ukuze zingaminyani.
Ekhuluma lentatheli kaMthunywa omunye umlimisi kunhlanganiso le eMashava, uNkosazana Vonayi Hove uthe abalimi bayaluthakazelela kakhulu uhlelo abalwenzayo nanko phela bathola ngitsho lethuba lokwenza lokho ababafundisa khona ensimini yomunye wabo.
“Sihamba sivakatshela abalimi bengamaqula sibafundisa ukuthi nxa belima kumele umumbu wabo wehlukane ngesilinganiso esingaba yi-30cm le-90cm ukuze ungaminyani nxa sukhahlela.
“Sibacebisa njalo ukuthi bahle bafake ifethalayiza okuthiwa yi-Compound D ngesikhathi behlanyela kuthi ngemva kwamaviki amane bafake i-top dressing,” kulandisa uNkszn Hove.
Uqhubekele phambili wathi umlimi angalandela lindlela abe lesivuno esihle bamnika umvuzo wokuba yi-master farmer ngenhloso yokukhuthaza abanye abalimi ukuthi balandele indlela le yokulima.
UNkszn Hove uphethe ngokukhuthaza abalimi ukuthi bahlakulele izilimo zabo ngoba bengekela ukwenza lokhu zilakho ukuhlaselwa lukhula kanye lobudli.
“Nxa izilimo zingahlakulelwa zandise ukuhlaselwa yimikhuhlane eminengi elakho ukuphambanisa ukukhula kwezilimo zabo.
“Kodwa nxa sekuthe kwenzeka ukuthi zihlaselwe yimikhuhlane kuqakathekile ukuthi abalimi baphangise bazise abalimisi babo ukuze bathole usizo izilimo zabo zingakaphambaniseki,” kuphetha uNkszn Hove.
Online Reporter