admin
Kuliviki uMthunywa uxoxe lomculi wezokholo uThembani Dube odume ngobungcitshi bakhe koBulawayo laseGwanda. Umculi lo kaculi nje kuphelele lapho kodwa utshaya leziginci. UDube usepheke amadlalade amathathu njalo elokucina liphume ngo2013. Intatheli kaMthunywa idibane lomhlabeleli lo kuyonale impelaviki. Ungezwa okunengi ngalumculi kungxoxo elandelayo phakathi kukaKearabiloe Nare (KN) intatheli kaMthunywa lomculi uThembani Dube (TD).
KN: Sesizwe ngendumela zakho, akusithi fahla ngokuthi ungubani njalo udabuka ngaphi?
TD: Mina igama lokuzalwa nguThembani Dube kodwa ngejwayele ukubizwa ngokuthi T Dube ngileminyaka engu-39 njalo angithathanga. Ngidabuka eGwanda, eMtshabezi ngaphansi kwenduna uMatema. Ngiphuma emulini elabantwana abayisithupha.
KN: Kungabakhona emulini yangakini abaculi abanjengawe?
TD: Phakathi kwethu siyisithupha ngilomfowethu uSindisani Dube laye ongumhlabeleli njengami njalo laye ucula ingoma zokholo.
KN: Kuyini okwenza wakhetha ukuhlabela ingoma zokholo hatshi eminye imihlobo?
TD: Ngazalwa emulini ekhonzayo lami ngakhula ngikhonza njalo bekungithokozisa ukulalela umculo wezokholo ikakhulu okaDerrick Ndzimande. Ngazalwa kutsha ngokomoya njalo ukuhlabelela kuyindlela yami yokudumisa uNkulunkulu lokuthandaza.
KN: Akuthi fahla ngembali yakho yokucula.
TD: Umculo wami uqale ukwazakala ngo2002 lapho engikhiphe khona idlalade lami lokuqala elibizwa ngokuthi Busa kimi. Kwathi ngo2003 nganxuswa ukuyacula kuMennonite World Conference okwenza umculo wami waduma kwamanye amazwe. KuWorld Mennonite Conference yikho engazuza khona abangane abanginceda ngemali ukuze umculo wami uqhubekele phambili. Ngo2010 ngakhipha idlalade lami lesibili elithi Nginekhaya elilengoma ethi Le Injabulo eyathokozelwa kakhulu koBulawayo laseGwanda njalo yandise ukudlalwa kuZtv. Ngo2013 ngikhiphe idlalade lesithathu elithi Kairos Time okutsho ukuthi God’s timing.
KN: Kungabakhona okubekele abalandeli bomculo wakho ngo2016?
TD: Yebo, okwakhathesi ngisebenza amavidiyo edlalade lesithathu njalo sengiphutshe ingoma ezimbili uMama Ngiyabonga lo Kwazi Wena.
KN: Ngaphandle kokuhlabela yiwuphi omunye umsebenzi owenzayo?
TD: Ngaphandle kokucula mina ngingumbalisi eMtshabezi High School njalo ngiyafunda eSolusi University.
KN: Yibuphi ubunzima osuthe wadibana labo njengomculi?
TD: Njengoba sengike ngatsho ukuthi ngaphandle kokucula ngingumbalisi ngasikhathi sinye ngisafunda, kuyenzeka ngesinye isikhathi ngehluleke ukuzuza ithuba lokuthi ngikhangele ezokucula ngenxa yeminye imisebenzi engilayo.
Lesi yiso isizatho esingenza ngiphuze ukupheka amadlalade ami.
KN: Yisiphi isicoco osuke wasithola?
TD: Idlalade lami lokuqala lelesibili lidlalwe kakhulu kuZtv njalo ngenelisa ukungena kuTop20 ngakho ngasenginxuswa kuWorld Mennonite Conference.
KN: Yiphi inkuthazo ongayitshiyela abanye abaculi?
TD: Umbhalo uthi ukuphuza kukaThixo akutsho ukuthi walile kodwa uyakusipha lokho esikucelayo ngesikhathi esifaneleyo ngakho engingakutsho kubaculi lalabo abalesifiso sokucula yikuthi yiloba bengahlangana lobunzima bengalahli ithemba ngoba liyeza elabo ithuba lokuphumelela.
Ngiyabonga Mthembo ngokusipha ithuba lokuthi sixoxe lawe ukuze abalandeli bakho bakwazi ngcono.
Online Reporter