admin
ITHEMU yesikolo yokuqala lonyaka siqunywe ngamaviki amathathu okuzenza ithemu le ibe lamaviki alitshumi nje kuphela okufunda.
Kubikwa ubufitshane bethemu yokuqala bubangelwe likhefu lePhasika elizananzwa kusukela mhlaka 25 kusiya ku-28 Mbimbitho.
Izikolo kule ithemu zizavalwa mhlaka 23 Mbimbitho kodwa zivulwe kuviki yokuqala kaNkwenkwezi.
UHulumende useveze ukuthi usekuqaphelisile ukuthi ithemu izaba mfitshane njalo sekhuthaze izisebenzi ukuba zisebenzise kuhle ithuba elifitshane elikhona ukuthi bafundise abantwana ngokugcweleyo.
UProvincial Education Director wesabelweni seMatabeleland North uNkosikazi Boithathelo Mnguni uthe bazasebenzisa ngokupheleleyo ithuba lokufundisa elikhona kulithemu.
“Lonyaka senze izinto ngokwehlukileyo ngoba ngelanga lakuqala sihle saqalisa ukufundisa ngoba sinanzelela ukuthi amalanga ethu malutshwana, bekungela sizatho umbalisi angacatsha ngaso ngokwehluleka ukufundisa ngalelolanga,” kutsho uNkkz Mnguni.
Eminyakeni edlulileyo abanye ababalisi bebefuna imali yokufundisa ngekhefu ngoba besithi abenelisanga ukuqeda wonke umsebenzi waphakathi kwethemu.
Kumnyaka ophelileyo, umphathintambo wogatsha lwezemfundo yaphansi laphezulu uDokotela Lazarus Dokora wamisa ukuqhutshwa kwezifundo zekhefu ngoba ethi isikhathi esibekwa nguHulumende sokufunda siyenela.
Umphathintambo lo waveza njalo ukuthi izikolo ezifisa ukuqhuba izifundo lezi kumele zibhalele ugatsha lwakhe zicela imvumo njalo kumele kube lesizatho esiqinileyo.
Kusenjalo, uDkt Dokora usechasise ukuthi abafundi abaya kuLower Six kumele baqalise izifundo zabo kuyonale ithemu njalo isinqumo sokuthi sebezaqala izifundo zabo ngethemu yesibili asisoze siqale lonyaka.
Abazali labanye osibalukhulu sebekhalaze ngokuthi abantwababo abaku Fomu 5 bafunda inyanga eyodwa kuthimu yokuqala bona bayabe bebhadale imali yesikolo yethemu egcweleyo.
Umsekeli kaDkt Dokora, uSikhwicamfundo uPaul Mavhima ugcizelele esithi izikolo kumele zibhadalise abafundi bakaLower Six imali ehambelana lesikhathi abazasifunda ngethemu yokuqala. — Chronicle
Online Reporter