Online Reporter
Ethel Ncube
ABALIMI bakhuthazwa ukuba badibhise inkomo zabo sikhathi sonke ukuze bavikele izifuyo zabo ekuhlaselweni yimikhaza.
UDokotela wezifuyo uJames Mukonde ubike ukuba abafuyi kumele babone ukuba inkomo zabo ziyadibha ukuze zingahlaselwa yimikhaza.
UDkt Mukonde uthe khathesi yisikhathi samahlanga, imikhaza isesekhona.
“Khathesi inkomo zisemahlangeni, abanye abasazivaleli bayazekela egangeni okwesikhathi eside zicine zilemikhaza.
“Sikhuthaza abalimi ukuthi badibhise inkomo zabo phose maviki wonke.
“Imikhaza ilakho ukuthi ihlasele inkomo ilimaze imbele yenkomo ezimunyisayo zicine zingasamunyisi kuhle ngenxa yemikhaza.
“Inkomo nxa zingakaphumi ekuseni zikhangele zonke ukuba azilamikhaza, ungabona sezilayo bona ukuthi njengomlimi uyahamba uyezidibhisa.
“Emakhaya kwezinye izikhathi amadibha ayaswela imithi, liyenelisa ukuhlangana libe bathathu lithenge imithi yokudibhisa lizidibhisele inkomo zenu,” kubika uDkt uMukonde.
Uqhubekele phambili eveza ukuba abalimi kumele bakuqakathekisa ukuhlala behlola izifuyo zabo.
“Abafuyileyo kodwa bengahlali lapho okulenkomo zabo khona kumele babone ukuba maviki onke bayagada besiyakhangela inkomo zabo njalo ubelebhuku lapho obhala khona nxa inkomo zakho sezidibhile, ubhale ukuba ilanga elilandelayo lokuba zidibhe kunini. Kuqakathekile ukuba ubhale phansi ngoba nxa sukhohliwe kuyakusiza lokho,” kutsho uDkt uMukonde.
