admin
KULIVIKI sihlangana lendoda eyathi loba ihlangana lobunzima kwezokuzithokozisa kweleSouth Africa yakhetha ukuqinisela ukuze ifeze iphupho layo, kukho konke eyahlangana lakho endleleni yacina inqobile yaba iyintshantshu.
Indoda le sike yathola ithuba lokuba ngumsakazi emsakazweni olodumo i-Diepsloot FM. Zwisisa ngcono kungxoxo elandelayo phakathi kukaSamkelo Tshuma lo Promise Sibanda owaziwa ngokuthi ngu DJ Mapressa.
ST: Singakayi khatshana sichazele ukuthi ungubani, owangaphi njalo udume ngani?
PS: NginguPromise Sibanda, ekhaya ngisuka eTsholotsho eGulumbane, ngafunda khona kwathi ibanga laphezulu uFomu 1 kusiya ku-4 ngafunda eTsholotsho High. Khathesi ngisebenza emsakazweni eDiepsloot FM, ngaziwa ngokuthi nginguDJ Mapressa.
ST: Susebenze okwesikhathi esinganani kwezokuzithokozisa?
PS: Sengisebenze iminyaka eyisikhombisa.
ST: Ngubani owakwenza waba lentshukutshu yokusebenza emsakazweni?
PS: Banengi abantu abangenza ngafisa ukusebenza emsakazweni, owokuqala ngubaba ngoba wayengafuni ukuthi sihlale ekhaya kungela rediyo, ngakho kwangenza ngafisa ukusebenza emsakazweni. Owesibili nguDJ Sbu ngesikhathi esebenza kuKhozi FM.
ST: Ukhona omunye umsebenzi owenzayo nxa ungekho emsakazweni?
PS: Yebo kukhona okunye, ngingumculi, ngingu DJ. Ngakhupha idlalade lami lakuqala le Houz-Kwaito ngo 2012 elibizwa ngokuthi Badidwa yisigubhu, ngazo khupha elinye njalo ngomnyaka ophelileyo elithi “isikhwama segista”.
Khathesi ngiqedisa elinye elizaphuma kunyanga ezimbili ezizayo ebengisebenza kulo ndawonye lo DJ Mthwakazi. Okwangenza ngacina ngisiba ngumculi nguEuphonik lo Kabelo abangifundisa ngezomculo.
Kwesinye isikhathi ngiyabhalela abaculi ingoma ababalisa uPetty Cash, ngiyanxuswa emicimbini ukuthi ngiyedlala njengo DJ.
ST: Suke wadlala emicimbini emikhulu?
PS: Yebo, sengike ngadlala emicimbimi emikhulu, le ibalisela iJoshua Nkomo kunye le Mzilikazi Day, le yimcimbi eyenzakala khonapha eGoli.
ST: Uqale nini ukusebenza eSouth Africa?
PS: Ngafika eGoli ngo2004 kwathi ngo 2008 ngasengizohlala khonapha sengisebenza.
ST: Njengoba suhlale lapha isikhathi eside yiziphi inhlupho oke wahlangana lazo kwezokuzithokozisa?
PS: Abathengisa umculo wethu ngokungekho emthethweni basibisela emuva. Okunye nje ukusebenza elizweni elingasi kini kuyahlupha ngoba kulalapho okumele uzenze umZulu ukuze abantu bakulungisele ulutho oyabe ulufuna, kuba nzima kimi ngoba mina ngiyaziqhenya ngobuNdebele bami.
ST: Kwabasakhulayo abafisa ukulandela enyathelweni zakho, seluleko bani ongabanika sona?
PS: Isiqokoqela yikuthi bafunde baqede izifundo zabo bengakangeni kwezokucula. Okwesibili nxa sebezimisele ukusebenza labakwazi ukuzihlonipha bangathathi izidakamizwa ngoba lezinsuku yizo esezibisele abaculi abatsha emuva.
Online Reporter