adminYiNtatheli kaMthunywa
SEKUVELE ukuthi zinengi iziphathamandla ezigangileyo kunguqu yakuleli, nanko icala likaFarai Mujokoro elokubheja ngemidlalo selixotshise losaziwayo kwezobukhokheli bomdlalo uJerry Sibanda lomqeqetshi kuzwa uPhilani ‘‘Beefy’’ Ncube.
IZimbabwe Football Association imise uBeefy loSibanda umsebenzi ngenxa yodaba lokuthi iBulawayo City yayifuna ukuqila kumdlalo wayo leBorder Strikers mhlaka 3 kuNcwabakazi. Ngokutsho kombiko weZifa, uSibanda loNcube babalesandla ekuzameni ukuqila umdlalo weBulawayo City leBorder Strikers enkundleni yeDulivadzimu.
Kukhanya zihamba zimlandela ezitshisayo uBeefy osemiswe ukuphatheka kunguqu ngesikhathi eseduzane lokuthola umsebenzi eSwaziland.
USibanda ngumgcinisihlalo weBulawayo City, uBeefy ubengumqeqetshi wayo anduba amiswe umsebenzi kusacazululwa icala likaMujokoro. UMujokoro loGift Mvala olilunga leBulawayo Chiefs bamiswe kunguqu okweminyaka emihlanu.
Isiqalo senkemenkeme le kwaba yi$300 okwakumele inikezwe uTatenda Sande unozinti weBorder Strikers.
Mhla uMujokoro ebika ukuthi angeke “afe” yedwa kulesi isiga wayeqinisile ngoba nanko sekungcolise lamabizo kaSibanda loNcube.
Incwadi evela kuZifa ilotshwe liqula labosahoho balinhlanganiso, ibika ukuthi uBeefy loSibanda bengalingi balugxobe kuloba yiwuphi umsebenzi wenguqu eZimbabwe.
“Inhlanganiso yeZifa, iqula le-executive, selivumelane ukuthi uJerry Sibanda loPhilani Ncube batshengisela ukuthi abahloniphi isisekelo sombuso weZifa. Bobabili benza iphutha lokungaziphathi kakuhle kwezemidlalo, lokhu kuchaza ukuthi bephula iziqephu sika-Article 2 (e) lo-Article 7 kusisekelo sombuso.
“Ukucazululwa kwecala labo kuzaqhutshwa kumalanga alandelayo,” kutsho umbiko ophuma kuZifa.
UMujokoro yena watshelwa ukuthi engalugxobi kwezenguqu okweminyaka emihlanu elandelayo. Lokhu kutsho ukuba umqeqetshi lo nxa efuna ukuqhubeka ekhuza abadlali, uzakwenza lokhu ngesizini yomnyaka ka2021.
Imizamo yokuxhumana loSibanda loNcube yehlule ngesikhathi iphephandaba likazulu lidinga umbono wabo kulandela ukuhlambazwa kwamabizo abo.
Kuliviki uMthunywa uxoxe labalandeli benguqu, lenkokheli ezibike ukuthi kukhona okunuka santungwana kunguqu.
USinikiwe Maphosa olilunga lababalisi labacubunguli beSports Management koBulawayo uthe indaba ezinje azandanga ukuphathwa kuhle ngoba kusetshenziswa imizwa endaweni yokuthi kudingwe iqiniso.
“IZifa yiyo ekwaziyo ukuthi icala leli lihamba njani. Labafakazi abahambise udaba baziwa yinhlanganiso le, mhlawumbe layo iPremier League. Okumele sikuqaphele yikungasebenzisi imizwa, umona lomhawu. Ngenxa yokuthi kulabantu abazizwa bedabukile ngodaba lwe$300 okumele iye kuBorder Strikers, akumelanga kusetshenziswe imizwa. Akudingwe iqiniso, kubanjwe bonke abalecala.
“Ngokubona ngelihlo lomuntu ongumcubunguli wezemidlalo, banengi ababephakathi kodaba. Lomqeqetshi lo uMujokoro wayengekho yedwa. Kodwa isixwayiso sami kulabo abaphethe udaba yikuthi bengayibambi ngekhanda.
Kunengi okuzavumbuluka lapha,” kutsho uMaphosa.
UMkhululi Siwela ongumlandeli wethimu yekhansili uthe angeke kwenze ukuthi uMujokoro adlale eyedwa kuloludaba.
“Sakubona ukuthi umfokaMujokoro lo wayengeke abeyedwa kulesi isiga. Imali yokuthi adize unozinti wayithatha ngaphi?” kubuza umsekeli lo.
Online Reporter