Sebeqaleka njalonje abafundi beBere High

Johas Moyo
KULANDELA ukuphuma kodaba lwabafundi okubikwa sebangeniswa ku-satanism eBere High School eseMashava kubikwa abafundi bakulesisikolo baqaleka njalonje okuyisehlakalo esethusa abazali kunye lababalisi.

Kuvele ukuba ukuqaleka kwabafundi lokhu okungapheliyo kuqalise kuviki ephelileyo lapho omunye umfana (ibizo siligodlile) abonakale ewela phansi ngemva kokubamba ibhayibhili khonangale esikolo. Kubikwa lumfundi uze wavuka ngemva kokuthandazelwa ngomunye umbalisi.

Kubikwa ukuthi inengi labaqalekayo ngabafana njalo bonke bathi bayabe bebona omunye untombazana okucatshangelwa ukuthi nguye okhokhela imisebenzi ye-satanism kulesisikolo.

“Mina sengisesaba lokuya esikolo kulezinsuku ngoba izinto ezenzakalayo aziqondakali.

“Banengi abafana esibabona beqaleka bethi bangavuka bathi bebebona untombazana okucatshangelwa ukuthi nguye umkhokheli womsebenzi wobumnyama ebabiza ethi kabaye elwandleni,” kutsho lumfana ngeloqhaqhazelayo.

Kuvele njalo ukuthi kulesisikolo banengi abafundi abakhala ngokugula okungaqedakaliyo okwenza abazali abanengi besabe ukusa abantwana kulesikolo. Labo abajoyiniswa inkolo le kubikwa bathi bayake bamunye igazi labantu ebusuku kuthi abalayo labo bahlala behlaselwa ngendlela ezitshiyeneyo.

Untombazana okucatshangelwa ukuthi nguye owenza imithanithani le esikolo kubikwa akasandisanga ukubuya esikolo nanko phela abantu bahlala bemkhuluma bemkhomba ngeminwe ngendaba ezenzakala esikolo.

UMnumzana Tendai Shoko othe ungumzali uthe abanye abantu bacabangela ukuthi kayisiyo satanism esesikolo kodwa ngabantu abagangileyo abasebenzisa imithi abenza konke lokhu kwenzakale.

“Kukhona asebecabangela ukuthi mhlawumbe kukhona abathakathi abahlasela abantwana besebebenza bakhulume indaba ezihlasimulisa umzimba.

“Abanye njalo bacabangela ukuthi kulabondofa kulesisikolo,” kutsho uMnu Shoko.

Omunye wababalisi ongathandanga ukuqanjwa ngebizo esesabela umsebenzi wakhe uveze ukuthi kunengi okwenzakalayo okulihlazo njalo okuzilayo lapho esikolo. Ababalisi sebengene kikho njalo abantwana abaqalekayo bayafihlwa bathandazelwe ngudlu okwenza kube ngani kuyabukiswa ukuba lilunga le-satanism.

“Sikhathele ngokuhlala sisesaba okungenzakala lakithi. Sekuphileka nzima lapha esikolo ngoba sekukompunzi idlemini ngabantwana asebephenduke izithunywa zomnyama sibakhangele,” kutsho umbalisi.

Imizamo yokuxhumana lomqondisi wezemfundo yehlule ngoba ucingo lwakhe lungangeni.