admin
YiNtatheli kaMthunywa
KUNENGI okufundwe zinkokheli zomdlalo womboxo kuleli kulandela ukunqoba kweqembu lamaBhokobhoko ngokunqoba inkezo yomhlaba.
Kuvelile ukuthi ukulolonga ithalenta okwenyanga ezine, ukuthola usekelo lokuzimisela kudala umehluko kwezemidlalo. Lokhu akukaze kwenzeke kumidlalo yonke kuleli nxa kulungiselelwa imncintiswano yamazwe.
Umongameli weZimbabwe Rugby Union uAaron Jani uchaze ukuba kunengi okumele kube yingqobe kunkokheli zemidlalo nxa isizwe sizafuna ukufika kuzinga leqembu lamaBhokobhoko kuminyaka ezayo.
NgoLwesibili kuliviki uJani utshele iphephandaba likazulu esebulenjini ngemva komdlalo wamaBhokobhoko lesizwe seNgilandi, wathi:
“Ukunqoba kwamaBhokobhoko kuyisibonelo esihle. Kulezifundo lapho.”
“Nxa isizwe sijonge ukuyaphambili ngomdlalo, kumele siqalise ukulolonga abadlali khathesi. Lapha ngikhuluma ngokulolonga abasakhulayo, abazadlala bonke okwesikhathi eside belinde ukuyancintisa. Ngokulandela uhlelo lwamazwe asephumelele njenge-South Africa, asisoke silahleke,” ngu Jani lo.
Kusenjalo, amaBhokobhoko aphule amarekhodi ngokunqoba. Iqembu leli libasele ama-try amabili abekwe nguMakazole Mapimpi loCheslin
Kolbe ngesigaba sesibili.
Eqhulwini lamarekhodi aphulwe ngamaBhokobhoko ngelikaSiyamthanda “Siya” Kolisi waseZwide, eBhayi, obe ngukaputeni wokuqala ngqa omnyama ukuqukula isicoco seRugby World Cup.
UKolisi, owazalwa ngosuku oluqakathekileyo eMzansi, ngoNhlangula 16, ubeye emqhudelwaneni engukaputeni wokuqala omnyama wamaBhokobhoko jikelele.
Ukunqoba kwakhe kulandela uFranscois Pienaar oyidle eGoli ngo-1995 loJohn Smit oyiqukule eFrance ngo-2007.
Elinye irekhodi lamaBhokobhoko abe liqembu lokuqala ukunqoba umqhudelwano emazwekazi amathathu ahlukeneyo; e-Afrika ngo-1995, e-Europe ngo-2007 lase-Asia ngo-2019.
Aphinde abhala kabutsha esiba liqembu lokuqala ukunqoba iRugby World Cup ekubeni eke athola induku esigabeni samaqoqo.
Iqembu likaKolisi loRassie Erasmus yilo elilabadlali abanengi abamnyama, abangu-11, ukuzedlula zonke ezamaBhokobhoko esezike zanqoba lo mqhudelwano.
AmaBhokobhoko aye eJapan ezilile kwazise bekusanda kudlula emhlabeni uChester Williams, olandele uJames Small abebedlala laye ngo-1995.
LoNelson Mandela obengumongameli wokuqala weNingizimu Africa engabe egiya ethuneni.
AmaBhokobhoko afice iNew Zealand ngokunqoba isicoco sesithathu somhlaba.
Online Reporter