Online Reporter
KULABADLALI benguqu abake batshibilika kuqembu lelizwe amaWarriors asebekhethwe ukuthi bayencintisa kumqhudelwano we-2025 Clash of Legends ozabe useFrancistown, eBotswana mhlaka 21 Nhlangula.
Iqula labadlali leli, iZimbabwe Legends, bazadlala leSouth Africa. Komunye umdlalo kuzadibana iBotswana leNamibia.
Imidlalo izabe isenkundleni ye-Obed Itani-Chilume.
Amaqembu azanqoba kusigaba sokuqala azahlangana kowokucona, kuthi lezo ezizanqotshwa, zizalwela inombolo yesithathu.
Kubadlali beZimbabwe abakhethiweyo kuloPeter Ndlovu, Willard Katsande, Tapuwa Kapini, Kaitano Tembo, Alois Bunjira. Esrom Nyandoro, Gift Muzadzi, Ronald Sibanda, Alexander Maseko, Method Mwanjali, Tinashe
Nengomasha, Desmond Maringwa loMasimba Dinyero.
Abanye ngu-Agent Sawu, Joel Luphahla, Herbert Dick, Zenzo Moyo, Edward Sadomba, Gilbert Mushangadzike lo Oscar Machapa.
Umqhudelwano weClash of Legends lo wasungulwa kuminyaka emithathu edluleyo. Omunye wabaqoqi bemidlalo, uSekhana “Nandos” Koko uthe bafuna ukuhlanganisa abadlali abake benza izimanga bedlalela amazwe abo, ngehloso yokuthi bathole ithuba lokuxoxisana ngempilo, babelane ulwazi lamacebo okuqhuba impilo zabo. -ubulembu
