admin
YiNtatheli kaMthunywa
INHLANGANISO ekhangele ngezokulima eye-Zimbabwe Commercial Farmers Union (ZCFU) isikhuthaze abalimi beNkayi North ukuthi badingisise ngendlela zokuvuna amanzi ngesikhathi sezulu ukwenzela ukuba benelise ukulima iloba yisiphi isikhathi somnyaka.
Kubikwa esikhathini esinengi abalimi kabalandaba lokuvuna amanzi ngakho bayalima nje okucina kubangela ukuba bathole isivuno esiphansi ngenxa yokuswela kwamanzi.
Ekhuluma lephephandaba likazulu, ebuzwa ngamacebo angasetshenziswa ngabalimi besigabeni seNkayi, uMnumzana Winston Babbage ongumgcinisihlalo weZCFU esabelweni esisezansi yelizwe uthe ukuvuna amanzi kuqakathekile ngoba kwenza umlimi enelise ukulima loba yisiphi isikhathi njalo lezifuyo lazo zilakho ukuzitholela amanzi okunatha.
“Ngenxa yokuna kwezulu elilutshwane lokutshisa kwelanga kakhulu, izakhamizi ezihlala ezigabeni ezinengi eMatabeleland ezibalisa leNkayi zikhangelane lokusilela kwamanzi.
“Sikhuthaza ukuthi nxa isikhathi sezulu sesifikile, abalimi bagijimele phambili badonse amanzi bawavune ngokukhongozela besebewasebenzisa ngesikhathi abasifunayo.”
UMnu Babbage uqhubekele phambili wathi kulendlela ezinengi zokuvuna amanzi ezigoqela ukugebha imigelo emasimini ukwenzela ukuba amanzi agelezele khona.
“Umlimi kumele agebhe imigelo le ukwenzela ukuba nxa izulu lingana amanzi agelezele kuzilimo zakhe. Umlimi ulakho ukuthelela ngawo amanzi la ngoba izulu lakhona lilakho ukuhamba okwesikhathi eside.
“Phezulu kwalokho abalimi bangagebha amagodi atshona okungaba ngamasentimitha angu-15 njalo bangawagqibeli kakhulu ukwenzela ukuthi amanzi agelezele phakathi,” kuchaza uMnu Babbage.
Online Reporter