admin
Bongani Ndlovu
ABABONA ngezezifuyo abeLivestock Production Development sebeveze ukuthi kulula ukufuya izimvu, okudingakalayo nje lulwazi ukuthi umlimi aphumelele kubhizimusi le.
Ekhuluma lentatheli kaMthunywa uMnumzana Cosmas Muzunde onguLivestock Specialist esabelweni seMatabeleland North ubike ukuthi abalimi badinga ulwazi ngokufuya izimvu ukuze bangaphambanisi ibhizimusi yabo ngokwenza okungayisikho.
“Izimvu njengezinye zonke izifuyo ezincane zilula ukufuya njalo ubuhle bazo yikuthi kazidingi ndawo enkulu yokufuyela.
“Nxa ufuna ukufuya izimvu zakho eziphile kahle bana lesiqiniseko sokuthi zithola ukudla okufaneleyo njalo okwakha umzimba okuzenza zihlale zilamandla.
“Nxa ungapha izimvu zakho indumba ze-soya beans, umumbu ziyakhula kuhle. Kumele zidle emadlelweni aqondileyo ngoba nxa kungenjalo kulula ukuthi zibanjwe yimikhuhlane,” kutsho uMnu Muzunde.
“Amanzi ngokunye okuqakathekileyo kumpilakahle yezimvu. Kumele zithole amanzi ahlanzekileyo ngoba amanzi angcolileyo azenza zihlaselwe yimikhuhlane,” kutsho uMnu Muzunde.
Ekhuluma ngokuvikela izimvu kumikhuhlane uthe:
“Ukuvikela kungcono kulokwelapha ngakho abalimi kumele benze isiqiniseko sokuthi bayavikela izimvu zabo emikhuhlaneni. Lokhu kungenziwa ngokubiza abeVeterinary Services ukuba bazokuhlolela izimvu zakho ngemva kwesikhathi njalo bakucebise ngemithi okumele uhlale ulayo ukuze izimvu zakho zihlale ziphephile,” kulandisa uMnu Muzunde.
Uphethe ngokuthi ukugela izimvu zomhlobo ole-wool ukuze zihlale zihlanzekile kuyancedisa ukuzivikela kumikhuhlane.
“Izimvu ezile-wool kumele zigelwe ngemva komnyaka owodwa ngoba nxa zingekelwa zikhula zicina zisiba lezibungu ezingabangela imikhuhlane,” kuphetha uMnu Muzunde.
Online Reporter