admin
Cornelius Luphahla
KUZABE kungabizwa ozwayo kulimpelaviki kumkhosi ozadibanisa abahlabeleli bakoBulawayo bonke ngenhloso yokujabulisa uzulu kanye lokuthuthukisa ezomculo.
Umkhosi lo uzavuthisa inkundla yeWhite City Stadium koBulawayo kusukela ngehola lesibili emini kuze kuyelamula ukuphuma kwelanga.
Kumcimbi lo kuzadibana abahlabela ingoma zika-maskandi, rhumba, house, kwaito, isicathamiya, hip-hop kanye lezokholo.
UMthunywa ukhulumisane loNkululeko Innocent Dube omunye wabahleli balumkhosi oveze ukuthi bajonge ukuthuthukisa ezomculo kungakho bakhuthaza uzulu ukuthi abuye ngobunengi bakhe ukuzozidlela ukudla kwamehlo.
“Njengabaculi bakoBulawayo umkhosi lo siwenze sijonge ukuzithuthukisa njengabaculi kanye lokukhumbula abaculi bakithi abahamba phambi kwethu. Ngalokhu-ke ukwenza umkhosi lo sindawonye kudala ukuthi sisebenze ngokubambana sibuye siqondisane lapho okulamaphutha khona,” kutsho uDube.
Ekhuluma lentatheli uJeys Marabini uthe umkhosi lo bafisa ukuwenza minyaka yonke.
“Umkhosi lo njengoba siwuqala lonyaka sesizawenza minyaka yonke ukuze abaculi abatsha labo baziwe emphakathini njalo abantu benelise ukuziqhenya ngabaculi bakoBulawayo bengaze bathembela kubaculi abaphetsheya.
“Kulabaculi abacula bephetsheya kwelizwe labo bazabe bekhona emkhosini lo ukuzovezela uzulu ukuthi kabamlahlanga.
“Ngikhuthaza uzulu njalo ukuthi abafuna amatikiti okungena emkhosini lo bazawathola kubaculi laba abazabe bekhona njalo azabe etholakala lamhla womkhosi lo,” kutsho uMarabini.
UMadlela Sikhobokhobo ongumlingisi njalo engumculi we-rhumba uthe abantu balindele ezimnandi ngoba uza loluju.
“Mina njengomculi ngithi abantu kabalindele ingoma ezimnandi kuphela ngoba yikho engizabazwisa khona uluju lwengoma. Ngalelilanga yikho esizavezela khona uzulu ukuthi iziphiwo zokumjabulisa zikhona kwelakithi,” kuphetha uMadlela.
Online Reporter