adminSengiqedele impahla zami
Ngithemba uphilile Khulu, ngehlukana lomfazi silomntwana oyedwa. Kunsukwana ezisanda kwedlula wafika ethi ulande okungokwakhe mina kangizange ngidinge okunengi wathwala impahla zonke ezazisendlini kodwa isimanga watshiya umntwana.
Khulu lokhu sokungokwesithathu ekwenza; ukuzothatha impahla. Besengilomunye ebesengisakha laye umuzi manje lokhu sekungikhathaza ngoba uhamba engilandela, njalo uselenamba zikamakhalekhukhwini zikamama engifuna ukumthatha kungakho usehlala emfonela emthuka. Ngenzenjani Khulu? Nguwe ongangihlahlelela lindaba.
Impendulo
Ngesintu sakithi esibalulekileyo umfazi uyavelelwa ngakibo ngusodombo eliyabe limthumile njengomuzi, ukwenzela ukuba lanxa isibane sothando sesichitshile, yenalo umuntu obengusodombo nguye okufanele ambuyisele ngakibo ayebatshela izizatho zonke ezenze umtshado wachitheka. Nxa kwenzakele konke lokhu akuvamanga ukuba khona kohlupho olalo. Kungakho-ke dinga usodombo wakho nxa ekhona umchasisele uhlupho obhekane lalo, libeselimthuma ngakibo kalo umama ayebabikela ngokwehlukana kwenu langohlupho asekupha lona. Okwesibili ulakho ukuyadinga lokhu abakubiza ngo kuthi yi-peace order emapholiseni. Lokhu kuzamenqabela ukuthi abe elokhu ebuya ezotshaphaza umuzi wakho, njalo kuzavikela lalo umama osuhlala laye. Kanti vele lezompahla ezithathwa amalombolombo kazipheli kutheni kumbe yiwo amangena njani okuzo gubha lokubasela uhlupho emzini wakho. Nxa kusese khona okwakhe kuthwale konke ukuse ngakibo hatshi ukuba umvumela ezophambanisa umuzi wakho. Engahlala esenzenje uzahlanyela ukungezwani phakathi kwakho lonkosikazi osulaye.
Ngifuna ukwenda kodwa ngilabadala
Sengalotsholwa kathathu ngisehlukana lamadoda
Ngingumama oleminyaka yokuzalwa engu-26, sengalotsholwa kathathu ngisehlukana lamadoda. Sengike ngabhoda kubosiyazi bathi bona ngilabadala kodwa mina kuyangihlupha lokhu ngoba mina ngifuna indoda. Abanewethu bayala ukungincedisa, abazali bami bona sebabhubha. Nginceda Khulu ngifuna ukuhlala emzini wami lami.
Impendulo
Awusatshongo phela mzukulu ukuba osiyazi bathi wenzeni njalo uhlupho lwakho lulungiswa ngokuphatha inkezo kumbe kufuna ukuba uye enkundleni. Nxa abanewenu besala kungcono uzame oyihlo abancane kumbe izihlobo zakibo kayihlo nxa kuyi kubamba inkezo zibike enyokeni zakini labo balelungelo lokwenza lokhu, njalo lazo inyoka zibavumele. Kwesinye isikhathi kuyabe kufuna uye enkundleni kungakho izihlobo zakho lezi zilakho ngosiko lwesintu ukumela lumsebenzi. Kuyadingeka ukuba ukuhambe sibili uyekuzwa ebantwini ababili kumbe abathathu ube usuqathanisa okuzwileyo ukuze uthi ngesikhathi ulungisa kube kanti ulungisa into ezakusiza. Isikhathi esinengi umuntu uvame ukusizwa yilokhu okholelwa kikho. Kuyadingakala ukuba uthi usenza wonke amasu angakuphilisa ufake ukholo lwakho phambili ukuze usizakale. Ngithemba bazakusiza abakini.
Online Reporter