admin
Johas Moyo
KULENDODA yeBinga etshiye inkundla yakule indawo ibulawa zimbambo kulandela ukuveza ukuthi okuyenza itshontshe njalo ibeliqili yikuthi ilemuli enkulu okugoqela amakhosikazi amane labantwana abangu-15 kungakho-ke iyehluleka ukuyiselela.
Umsolwa uGift Muzamba oleminyaka yokuzalwa engu-40 wesiqintini seSiabuwa, eBinga umiswe emthethwandaba lo kuviki ephelileyo njalo usele ebonga amadlozi akwabo nanko phela umantshi umxolele wathi kahambe ayefunda ukusebenzisa ijazi lomkhwenyana kanye lokuhlela imuli (family planning).
Umsolwa ubemiswe phambi komthethwandaba weBinga esetheswa amacala amabili, elokutshontsha kanye lelokuqila ezinye izakhamizi imali kanye lempahla yazo.
Umtshutshisi kulelicala uMnumzana Bruce Maphosa ubikele inkundla ukuthi mhlaka 7 Mfumfu nyakenye umsolwa wathengisela uMnumzana John Munsaka inkomo wabhadalwa i$200 ngalelolanga.
Kubikwa umsolwa walaya umamangala ukuthi abuye ngemva kwensuku ezimbili ezothatha inkomo yakhe kukhangelelwe ukuthi abe selungise amaphepha okuthi inkomo le ithwalwe.
Umamangala wathi eselanda inkomo yakhe wathola umsolwa esebaleke lemali njalo uthe ebuza unkosikazi kamsolwa wezwa ukuthi akulankomo eyayithengiswa.
Kuzwakale ukuba umsolwa wabaleka wayahlala eNorton duzane leHarare njalo uze waphenduka lonyaka ngoMabasa.
Inkundla izwe njalo ukuthi mhlaka 15 Mabasa umsolwa wagqekeza endlini kaMnumzana Siamuzoka Ndlovu oleminyaka yokuzalwa engu-71 watshontsha i-solar panel, iwayilesi (radio), i-battrey kanye lengubo okubiza i$115.
Kuthe ngokubotshwa kwakhe zatholakala impahla njalo mhlaka 22 Ncwabakazi wabisela imali kaJohn wayacela uxolo.
Umsolwa kazange achithe isikhathi senkundla ngoba uhle wavuma amacala akhe phambi kukamantshi uAilene Munamati njalo wasecela ukwephulelwa isigwebo sakhe.
Ebuzwa ukuthi kungani etshontsha njalo eliqili uveze ukuthi imuli yakhe inkulu njalo iyamehlula ukuthi ayondle.
Umantshi umzwele umsolwa wamlaya ukuthi angaphindi enze amacala afanayo ngoba uzavalelwa.
Online Reporter