admin
Johas Moyo
KULENDODA yeBinga egwetshelwe ukuyapika ejele okweminyaka emithathu kulandela ukutholakala ilamacala amabili, elokuthiya kanye lokubulala inyamazana zendle okungekho emthethweni.
Umsolwa uThomas Saviour Mudenda ovela eLusulu, eBinga ubemiswe phambi komthethwandaba ngeviki ephelileyo ngemva kokubanjwa elemihwabha yenyathi engaba yi-30kg.
Inkundla izwe ukuthi umsolwa wangena eChizarira National Park engelamvumo wathiya inyamazana esebenzisa amawaya. Umantshi uzwe ukuthi ngelanga elingaziwayo kodwa ngoNcwabakazi kuwonalo umnyaka umsolwa wangena wathiya inyathi ngemijibila wabamba eyodwa.
Kubikwa mhlaka 1 Mpandula wabanjwa yizisebenzi ze-National Park le elemihwabha le.
Inkundla izwe ukuthi inyathi eyodwa ibiza i$10 000.
Umtshutshisi kulelicala uMnumzana Bruce Maphosa uphinde wabikela inkundla ukuthi umsolwa wake wavela njalo emthethwandaba ngo2012 ngecala elifanayo lapho aphunyuka khona nanko phela waphiwa isigwebo sokusebenza kungelambadalo.
Umantshi uNkosikazi Ailene Munamati uthole umsolwa elecala waquma ukuthi ayepika ejele iminyaka emithathu andubana amephulele umnyaka owodwa ngoba eziphathe kuhle ngesikhathi kuthoniswa icala leli.
Ngesikhathi esethula lesisigwebo umantshi uthe ufuna lokhu kube yisibonelo esigabeni lesi ngoba bebanengi abathiya inyamazana ngemijibila.
Online Reporter