adminAbel Ndooka —
HATFIELD Girls High yemuHarare inoti chikwata chayo chemujaho wekumhanya chagadzirira kukwikwidza kumitambo yeMbare-Hatfield District Track and Field Competitions.
Mijaho iyi ichaitirwa paAllan Wilson, muHarare musi wa3 Kurume uye ndipo pachazosarudzwa chikwata chichazonomirira purovhinzi yose kumijaho yemaProvincial Competitions.
Mutungamiri wechikoro cheHatfield Girls High – Mai Tsungai Makura – vanoti chikwata chavo chagadzirira zvikuru kuenda kumitambo iyi.
Vanoti chishuwo chavo ndechekupinda mumakwikwi emapurovhinzi kusvika kune enyika yose pamwe nekunze kwenyika.
Mai Makura vanoti gore rino Hatfield Girls High ine shangwiti dzinomhanya zvikuru idzo vachatumira kuAllan Wilson masvondo ari kutevera kumijaho yedistrict.
“Gore rino tine vasikana vanomhanya kunge vakomana uye tinodada navo zvekuti tiri kuvatemba kuti vachanobata basa sebasa kumijaho yedistrict.
“Gore radarika, takamirira-mira nekuti takapedza tiri pechitatu asi gore rino tinoziva kuti tisu tichahwina muMbare-Hatfield uye tichange tine shangwiti dzichanokwikwidza kumijaho yenyika yose,” vanodaro Mai Makura.
Mashoko avo anotsinhirwa nachamangwiza wezvemitambo paHatfield Girls High, Elizabeth Mabhugu, achiti gore rino chikwata chavo chakaisa tariro yacho pavatambi vakaita saNicole Matongorere, Trish Nyamunga, Mildred Ndoro, Anna Njenga naTafardzwa Nhira kuti vagohwapura menduru kumijaho yenyika yose.
Vasikana ava ndivo vevamwe vakadadisa zvikuru svondo radarika apo pakaitwa makwikwi emainter-house competitions pachisarudzwa chikwata chichazonomirira Hatfield Girls High kumujaho weMbare-Hatfield District Competitions.
Online Reporter