Uzonde ugane unwabu uChindungwe

YiNtatheli kaMthunywa
UKAPUTENI wequmbu leHighlanders uFelix Chindungwe uzonde udla inja enkambeni nanko phela usekhuze abanye bakhe ukuthi baguqule isimo sethimu ngokunqoba kumidlalo elandelayo.
UChindugwe uthe asimlandu womqeqetshi yedwa ukuthi abone ngokunqoba kwethimu ngoba abadlali yibo okumele bavuse inkophe.

Umqeqetshi weHighlanders uBongani Mafu ulomthwalo wokuthabisa abalandeli beBosso ngemva kokuba abafana bakhe bedlale udaka kumidlalo emibili edluleyo beleBuffaloes leChapungu.

Kuliviki uMthunywa ufike enkambeni yeBosso yokulolonga kwavela ukuthi abadlali batsheliwe ngokuthi kumele batshintshe umdlalo.

Kubikwa uMafu uqonqosele ukuba nxa abadlali bakhe bengafuni ukuhlohla lokunqoba kungangcono babuyele ngakibo.

UChindungwe uthe laye njengokaputeni ukhathazekile ngokwehluleka kwethimu ukuthi idabule amambule isizini isaqalisa.

“Nxa isizini iqalisa kanje kumele siqale ngokuhlohla. Phezulu kwalokhu, ukunqoba yikho okubalulekileyo.

Akumelanga ukuthi sinqotshwe loba sehluleke ukuhlohla, wonke umuntu eqenjini uyakwazi lokhu.”

UMafu ubike ukuthi uselolonge ithimu akhangelele ukuthi ilethe imiklomelo kumidlalo elandelayo. Kulimpelaviki iHighlanders ingena umango isiya enkundleni yeVengere, kuDongo Sawmills, kumdlalo wesithupha weligi yeCastle PSL.

Umqeqetshi lo ulomthwalo wokuthabisa abalandeli beBosso ngemva kokuba abafana bakhe bedlale udaka kumidlalo emibili edluleyo beleBuffaloes leChapungu.

“Kumele sihlohle njalo sinqobe. Akula mbiko engingawutsho kubadlali bami ngaphandle kokuthi lesi yiso isikhathi sokuzitshengisela. Nxa singanqobi kungcono abadlali bekele ukudlala phela. Ingqobe ikubo nxa sebephakathi kwenkundla.”

Uqhubeke wathi: “Sesidlale imidlalo emihlanu singatholi imiklomelo, ngilokukholwa ukuthi sizenza kuhle kulimpelaviki sidibana leDongo Sawmills.

Umsebenzi kaMafu usengozini ngoba engadliwa kumidlalo emibili kumbe emithathu elandelayo, abasekeli beBosso bazacela ukuthi akhitshwe.

Ngokunqotshwa yiChapungu eBarbourfields, abasekeli ababukela umdlalo abazange baphuze ukubika ukuthi bayasola indlela aqeqetsha ngayo.

Okwamanje sekulodleltshana lokuthi kulequla labasekeli abakhankasela ukuphenduka kukaRahman Gumbo esihlalweni.