Online Reporter
Nkosilathi Sibanda
INHLANGANISO ebona ngokugcinwa kwemvelo, i-Environmental Management Agency (EMA), isiqinise umkhankaso wayo wokulwisana lokungcoliswa kwemvelo ngama-plastic.
Ngemizamo yokukhuthaza umphakathi ukuthi ulondoloze imvelo, kuhlelwe ukuthi inyanga kaNtulikazi kube yisikhathi sokukhankasela lokhu.
Kuzo zonke izabelo zelizwe, i-EMA isifundisa izakhamizi labantwana bezikolo ngokuqakatheka kokuphathwa kuhle kwengcekeza lokunciphisa ukusetshenziswa kwama-plastic.
Umkhankaso lo uqiniswe kakhulu ngoLwesihlanu olwedluleyo ngesikhathi ilizwe lisenza umkhankaso wokuhlanzwa kwendawo (National Clean-Up Campaign), lapho umlayezo wokwakha iZimbabwe engelangcekeza yama-plastic ugcizelelwe kakhulu.
EMatabeleland North, izakhamizi, abafundi, labakhokheli bomphakathi bahlanganyele ekuhlanzeni indawo, bebutha ingcekeza. Lokhu kutshengise ukuthi imfundiso eqhutshwa yi-EMA isiletha inguquko ebonakalayo emphakathini.
Kusenjalo, ugatsha lwezeMvelo, Ezomumo womkhathi lenyamazana zendle lukhokhele ngomkhankaso omkhulu wokuhlanzwa kweFourth Street Bus Terminus eHarare.
UNobhala Omkhulu wogatsha lolu, uMnumzana Simon Masanga, ukhuthaze uzulu ukuthi aziphe umlandu wokugcina imvelo ihlanzekile.
“Indawo ehlanzekileyo ngumlandu womuntu wonke,” kutsho uMnu Masanga, kumbiko okhitshwe yilolugatsha.
Ngaphandle kokulwisana lokungcoliswa ngamapulasitiki, i-EMA iqhubeka ikhankasela lokuvikelwa kwemvelo kumlilo yendle ngokufundisa lokuqinisa ama-Environment Sub-Committees ukuze umphakathi wenelise ukuvimba ukuqhamuka komlilo.
