Online Reporter
Innocent Kurira
INHLANGANISO yeBulawayo Athletics Board (Bab) ikhangelelwe ukuqhuba umncintiswano omkhulu oweNational Athletics Association of Zimbabwe (Naaz) Open Championships ozaqhutshelwa eWhite City Stadium ngoMgqibelo.
Lo ngumcimbi ozaveza ukuthi ngobani abazakuya ku-AUSC Region 5 Games eNamibia ngoNtulikazi. Uzaphinda ubengumncintiswano wokusungula oweSouthern Region Senior Championships ozabe usedolobheni leHarare ngoNtulikazi.
Njengoba abancintisayo bebanga ukunqoba kumincintiswano le, kukhangelelwe ukuthi owangoMgqibelo ubuthanise amathalenta avela endaweni ezinengi zakuleli.
Umgcinisihlalo weBulawayo Athletics Board, uWatson Madanyika uthe lo kuzakuba ngumncintiswano omkhulu elizweni njalo kuzadibana intshantshu.
“Silindele ukuthi kube lethalenta elizwayo elizancintisa ngempelaviki ngoba kumncintiswano lo kuzakhethwa labo abazamela ilizwe. Leli lithuba elibalulekileyo ukuthi abancintisayo baveze ithalenta labo lokugijima ukuze bakhethwe kuqembu lelizwe,” kutsho uMadanyika.
Umncintiswano lo uzagoqela ukweqa i-long jump, triple jump lokujika i-hammer throw, javelin shot put, discus, ama-relay, 100m, 200m, 400m, 800m, 1500m, 3000m, le5000m. Kuzancintiswana kuzigaba lamabanga abalisela ama-Under-14, Under-18 lama-Under-20.
Ukhulume ngokubaluleka kumncintiswano wangoMgqibelo.
“Umqhudelwano lo ubalulekile ekuthuthukisweni umdlalo wokugijima kwelakithi, kuyasijabulisa ukubona indlela abagijimi bethu abenza ngayo,” kutsho uMadanyika.
Kusenjalo, kuyaqhubeka ukubhalisa ukuncintisa kumjaho omkhulu, osuphendukile oweBaldmin Bulawayo Marathon.
Umncintiswano lo uzakuba khona mhlaka 19 Mabasa njalo kuzancintiswana ku-21km, 10km laku-5km.
Ngokutsho kwabaqoqi bomjaho, labo abafuna ukuncintisa bazabhadala i-$US15.
