admin
YiNtatheli kaMthunywa
INKOKHELI labonompembe bomdlalo wenguqu kumhlubulo ongezansi yelizwe bazathola ukwengeza ulwazi kulumdlalo kulandela ukuphawulwa kohlelo lwemfundo okuvela kunhlanganiso ye-World Rugby Union.
Izifundo lezi ziqale ngeviki edluleyo enkundleni yeHartsfield koBulawayo lapho obekubuthene abaphathi bomdlalo abalitshumi lasithupha.
Akuzange kube lethuba lokuthakazelela ikhefu likaZibuse nanko phela uhlelo lolu luqhubekele phambili eHwange lase-Victoria Falls.
Inhlanganiso ye-Zimbabwe Rugby Union (ZRU) ithe indikimba yezifundo egxile ukukhaliphisa abaphathi bomdlalo labonompembe ukuze bahlale besazi ngenguquko ezikhona.
Besekuyisikhathi eside inhlelo ezinje zingafinyeleli esabelweni seMatabeleland North. Isidingo sokukhulisa umdlalo kulumhlubulo welizwe yiso esifuqe inhlanganiso ye-ZRU ukuthi ikhumbule ukuza kulindawo.
Umdlalo we-rugby uthathelwa phezulu koBulawayo kuphela. Emadolobheni aseHwange le-Victoria Falls, lumdlalo usezikolo ngoba akula nkundla ezingasetshenziswa ngumphakathi.
Imizamo yokwakha inkundla yalumdlalo eVictoria Falls yaphelela emoyeni kuminyaka edluleyo, kuthi eHwange inkundla ezazikhona azisanakekelwa kakuhle kulandela ukuwa kwenkampani yeHwange Colliery.
Ekhuluma loMthunywa umqondisi wezemfundo kunhlanganiso yeZRU uBarney Chivani uthe kuyisifiso sabo ukuthi bafundise inkokheli ezinengi kulumhlubulo.
“Isibanga somdlalo kundawo ezingaphandle kwamadolobho amakhulu asijabulisi. Izifundo lezi ngezokukhaliphisa abaphathi labonompembe.
“Ngemva kokuguquka kwemithetho ethile yomdlalo, bekubalulekile ukuthi senze lezi izifundo,” kutsho uChivani.
“Ukusabalalisa umdlalo we-rugby kubalulekile. Nxa sesifundise abaphathi kanje, sekulula ukuthi umdlalo uqhubeke.”
Uthe njengoba umdlalo wabo usuvunyelwa ukuthi uphenduke enkundleni, balokukholwa ukuthi lasesabelweni seMat North kuzasungulwa amaqembu azaphatheka kumincintiswano ekhona elizweni.
Online Reporter